Parlamentario di PPA, Eduard Pieters, ta cuestiona e tardansa den implementacion di medida pa ekipa Cuerpo Policial, despues di un incidente fatal cu polis tabata involucra. El a señala cu, a pesar di mocion y un amienda presupuestario di 12 miyon florin, varios necesidad di polis ainda no ta atendi.
Pieters a recorda cu dia 4 di maart 2025, Parlamento a aproba un mocion pa mehora e ekiponan di Cuerpo Policial, incluyendo bodycam, taser y traangas funcional. Segun Pieters, e medida tabata destina pa preveni incidente fatal, proteha ciudadano y agente policial, y garantisa cu e intervencionnan por ta registra riba video.
E parlamentario a indica cu e mocion tabata inclui firma di e actual minister di Husticia, mr. drs. Dowers, kende e tempo ey tabata parlamentario. Sin embargo, mas di un aña despues, Pieters ta cuestiona pakico e medida ainda no ta implementa completamente. El a agrega cu e traangas cu polis tin actualmente ta caduca y no ta funciona adecuadamente.
Pieters a bisa cu PPA no a limita su mes na critica, sino tambe a presenta un amienda na presupuesto di 2025 pa aloca 12 miyon florin pa Cuerpo Policial y Grensbewaking. E fondo tabata destina, entre otro, pa material, uniform, taser y bodycam, p’e agente por cumpli cu nan trabou di mantene orden publico y proteha comunidad.
Segun Pieters, e fraccion a sigui pidi informacion na minister tocante n’e entrega di bodycam. El a menciona cu durante un reunion cu altocomisario Arnhem, nan a ricibi informacion tocante n’e proyecto piloto. Segun loke e minister a comunica, e bodycamnan lo ta entrega na tur polis pa luna di juli, pero Pieters ta comenta cu, e fecha a pasa sin cu e implementacion a completa.
Pieters a expresa condolencia na famia di e persona cu a fayece den e incidente reciente y a desea nan forsa durante e momento dificil. Sinembargo, e parlamentario a declara cu, segun su opinion, minister Dowers mester carga responsabilidad politico p’e falta di progreso cu e medida aproba pa Parlamento.
Pa mas lesa TREMPAN.COM.
