E Comite Olimpico Ruso a anuncia cu nan a transferi electronicamente $15 miyon na e Comite Olimpico Internacional, como parti di e demanda pa lanta e sancionnan imponi pa e manipulacion sistematico di regla y e sistema antidopahe na Rusia prome y durante Sochi 2014.
E speculacionnan ta abunda ya cu COI ta acerca cada biaha mas na permiti cu e atletanan Ruso marcha tras di nan bandera nacional den e ceremonia di clausura di e Weganan di Winter, un movemento cu lo pone un fin na e prohibicion cu a pone riba nan cabes tres luna pasa.
E suspension, di acuerdo cu COI, por wordo lanta parcial of totalmente. E Rusonan ta participa actualmente den e weganan den colornan neutral, bao di e bandera Olimpico y e nomber di e ekipo como atletanan Olimpico di Rusia (OAR)
E Hunta Ehecutivo di COI mester dicidi awe, dia 24 di Februari, si e suspension di Rusia di e Weganan Olimpico lo wordo lanta of no. E decision lo basa riab e recomendacionnan di un grupo di implementacion, presidi pa miembro di e Hunta Directiva di COI, Nicole Hoevertsz di Aruba.
“Nos no ta excluyendo ningun opcion. Ainda nos no a yega na un decision final. Nos ta yegando na e momentonan aki, pero e promenan den conoce e decision aki lo ta e Hunta Ehecutivo. Solamente confia den e proceso, no solamente den mi, ta un esfuerso di ekipo completo, ta pasando hopi cos y e ekipo t trahando hopi duro. Nos ta buscando e miho interesnan di COI y di tur,” Hoevertsz a bisa mientras e tabata papia cu periodistanan na Pyeongchang.
ROC, den un comunicado, a bisa: “Dia 5 di December 2017, e Comite Ehecutivo di e Comite Olimpico Internacional, a establece un serie di criteria cu ta necesario pa restaura e Comite Olimpico Ruso na COI.”
“Un di nan ta e pago di $15 miyon pa e desaroyo di e sistema internacional antidopahe y e coordinacion di e interaccion den e area aki entre COI, e WADA (Agencia Mundial Antidopahe) y e federacionnan deportivo internacional. Te cu e fecha, e monto aki di ROC a wordo paga den su totalidad.”
“Por lo tanto, tur e rekisitonan financiero cu e Comite Olimpico Ruso a presenta pa e eliminacion di e suspension temporal, a keda cumpli na e momento aki.”
E atleta Ruso Aleksandr Krushelnitchkii a wordo despoha di su medaya di brons diahuebs di e weganan di 2018, despues di a admiti un violacion di dopahe. El a wordo purba den forma positivo como un substancia prohibi “Meldonium”, cu ta vincula na e mehoracion di e capacidad cardiovascular.
Krushelnitckii, kende a gana un medaya di brons cu su casa, Anastasia Bryzgalova, den e doblete di doubles mixto, a enfrenta na un procedimento di dopahe cu a cuminsa dialuna pa e Tribunal di Arbitrahe Deportivo (CAS).
E infraccion di dopahe ta bin cu Rusia, cu ta busca pa demostra cu e ta limpiando su acto, despues di e consecuencianan di e sistema di dopahe, patrocina pa e estado, cu autoridadnan Ruso ainda ta mantene cu no tabata existi den e weganan di 2014, na Sochi.
Mientras tanto, Alina Zagitova, di 15 aña di edad, a gana pa e atletanan Olimpico e prome medaya di oro di Rusia (OAR) na Pyeongchang 2018 den e titulo di schaatsmento artistico femenino, cu un show espectacular. E conteo di e medayanan di OAR tambe ta inclui 5 medaya di plata y 9 di brons.
Desafortunadamente, e adolescente Ruso a ricibi su medaya den un ceremonia unda cu e banderanan Ruso y e himno nacional tabata ausente. Su compatriota Evgenia Medvedeva a ricibi e medaya di plata den e mesun categoria, cu a caba hopi cerca di Alina.

Comments

comments