“MinPres a declara pa di tantisimo biaha na Parlamento cu ainda e rapport di CAD tocante Arubahuis y ex GevMin Besaril no ta cla, loke ta hopi straño. E punto importante toch no ta si e rapport ta cla of no, sino si MEP ta tuma na serio un rapport di CAD. Nos experiencia ta cu MEP no ta haci nada cu un rapport di CAD,” ta loke cu miembro di partido RED Democratico y ex-minister Rudy Lampe a indica den un comunicado di prensa.
E ta sigui bisa: “Un di e motibonan cu ReD a lanta ta cu e partidonan tradicional ta pone rapport di CAD of di ARA den lachi y no ta haci nada cu nan. Ora ReD a drenta gobierno nos a cambia e dinamica aki. E momento cu nos a descubri iregularidad den e susbidio di SKOA, nos a encarga CAD cu un investigacion independiente y profesional. A pesar cu CAD ta onderbezet, den cuestion di luna rapport a keda cla. Pero mas importante ta cu nos a tuma diferente accion a base di e rapport di CAD, entre otro terugvordering di subsidie y bay Ministerio Publico. Nos partner den coalicion, MEP, a purba tur manera pa debilita of sconde e rapport aki di CAD.
MEP tin un pasado caba di no tuma na serio un rapport di CAD. Djis pa menciona otro ehempel. Ora mi tabata miembro di parlamento mi a pidi minister di finansa di MEP, Nilo Swaen, inzage den un rapport di CAD tocante DIP. Minister a nenga mi esey y lider di fraccion di MEP a bisa mi bay hues pa haya e documento. Finalmente di un manera no oficial mi a wak e rapport aki di CAD fecha 15 di november di 2005. E rapport di CAD ta conclui cu e gasto di personal di DIP, e tempo ey e minister di DIP tabata Marisol Lopez Tromp, a surpasa e presupuesto aproba. CAD ta señala cu esaki ta en pugna cu articulo 31 di nos Ley di Contabilidad. CAD ta constata cu den practica “worden indienstnemingen, bevorderingen (al dan niet met terugwerkende kracht) en toelagetoekenningen veelal niet getoetst aan de begroting”. No tin un structura organisatorio pa stipula vacatura y e procedura pa yena un vacatura, manera un proceso di solicitacion. E conclusion di CAD ta: “De personeelskosten kunnen hierdoor onvoldoende worden beheerst”. For di e tempo ey caba tabata existi spirit na DIP. MEP no a haci nada cu e rapport devastador aki di CAD. Y AVP tampoco.
Pesey nos ta pesimista cu awo si MEP ta bay hasi algo serio cu un rapport di CAD tocante Arubahuis y Besaril.
