E incidente cu a tuma luga diamars anochi ta uno sumamente lamentabel, cu perdida di un bida asina hoben.
Miembro di fraccion di AVP den parlamento y alabes ex-minister di husticia, mr. drs. Arthur Dowers tabata den noticiero Enfoke, caminda cu el a duna su punto di bista riba e asunto aki.
E ta conta tempo cu e tabata minister, cu a bin na 2009 a “hereda” un situacion, uzando palabra di Andin Bikker, caminda cu e pais aki tabata den un caos total pa loke ta trata siguridad y no tabatin ningun cifra of nada. Mester a dobla manga y cuminsa pone tur cos na ordo, ta locual cu Dowers a duna di conoce.
No ta tende nan ta bisa cu ta culpa di e minister awo
E tempo aya, cada biaha cu algo pasa, cada crimen cu tuma luga, oposicion tabata grita tur caminda cu Dowers su nomber den nan boca taskeiro rond. Hasta den prensa opositor su nomber tabata sali y riba prome pagina. Pueblo tabata sa bon cla cu e tempo ey nan tabata paga hende pa comete atraco.
Ora cu mira awendia e desgracia y drama, por mira cu tur a keda keto. Dowers no ta bin bisa, ya cu e tabatin responsabilidad di e cartera, cu mester acusa ningun minister directamente, pasobra e mes no a acusa ningun minister.
Loke e ta haci ta denuncia maneho. Loke si a constata cu e minister actual a bay den parlamento bisando cu tur cos ta trankil y stabiel. Esey ta un eror historico cu e minister a comete di bisa esey, pasobra nada ta stabiel.
Tur hende sa cu tin un situacion di riesgo hopi grandi, no solamente den e pais, caminda cu tin cierto desaroyo di empobrecemento di e pueblo, pero tambe e desaroyonan den e region y mundialmente cu tin cierto consecuencia cu ne.
E tempo ey a bisa cu no tin radar, cual ta un gañamento. Awo tin mas radar cu e tempo aya. Awo tambe tin helicopter ta bula atrobe. Tin e frontera completamente cera. No tin ningun barco, ni un boto, nada fo’i Venezuela supuestamente. Y awendia e pais aki tin mas arma cu nunca. A bin compronde fo’i hende hoben riba caya, cu por cumpra un handgranaat na Aruba pa solamente $100.
Ta un situacion sumamente alarmante. Y awo tur ta keto. Tabatin un tempo cu kico cu pasa, crisis tabata den boca di e opositornan. Si no tabatin crisis, lo a dedica extra atencion n’e situacion. Pero nan no tin atencion p’e situacion. Por a mira cu nan a bay Bali, a bay Europa, ta keiromento tur caminda. Awo tin fiestamento na Den Haag. Esaki ta e maneho cu tin contra criminalidad?
