Diahuebs mainta a tuma luga un presentacion pa prensa y otro invitado caminda Departamento di Asuntonan Social (DAS) su sucursal na San Nicolas hunto cu Centro pa Hoben y Famia kier a presenta e campaña titula ‘Topa Nos Na Mita’. Esaki tin como obhetivo principal pa laga pueblo cera conoci cu e recurso y relacionnan cu DAS tin na su disposicion pa yuda e ciudadano. Miriam Illidge, trahador social di DAS a splica cu e intencion ta pa tin mas sesion similar pa cubri tur grupo den comunidad y atende nan pa medio di e strategia di ‘outreaching’.
Den forma di carrousel tabatin varios instancia presente, incluso hopi cu comunidad no ta familiar cu ne. “Esey ta e meta principal pasobra Aruba ta pasando door di temporada hopi dificil, no solamente despues di Covid, pero prome cu esey tambe. Pa nos ta hopi importante pa traha cu outreaching. No solamente pa laga e situacion yega na cas di nos akinan, pero pa nos traha un tiki preventivo. Kier men cu pueblo sa cu tin yudansa. Tin hopi instancia cu profesional cada un cu nan experticio riba tereno y ta importante pa pueblo sa kico tin,” asina Illidge a splica. Ya caba DAS sa haci e tipo di presentacion aki mas biaha pa scol y docente. Di e mesun forma lo continua pa captura full e pueblo di Aruba.
