Rowald Tromp no ta un persona desconoci den comunidad. Tur hende sa di su situacion social y e biaha aki el a keda un luna den hospital y e mester sali diamars, 21 di Augustus.
Ya pa algun tempo e tin mester di yudansa social. E tin por lo menos un aña ta pidi auxilio. For di e momento cu gobierno a sinta, el a pidi tur tipo di yudansa. Tambe na minister Glenbert Croes, kende ta minister di asuntonan social. Nan a bir’e tur manera cu awo ni contesta nan ta dun’e.
Awo despues di un luna cu e tabata den hospital, nan ta lag’e bay diamars, y e no tin caminda pa keda. Na mas cu un biaha el a tuma contacto cu nos. Ya for di 2 siman pasa caba, nan a purba di ten’e den hospital y awo e tin cu sali. E ta yorando na rudia pa un yudansa social. E tin mester di ayudo.
Den su propio palabranan el a splica cu e tabata busca ayudo den e vianan social. E tabata tin MSRA y nan no tabata yud’e. Departamento di Asuntonan Social mes a mande bay subi riba Facebook y haci un peticion riba Vraag en Aanbod pa un apartamento of cualkier luga pa e por a keda.
Di su mes el a busca varios caminda, hopi hende kier a hort’e. El a bay te hasta na centronan di adicto cu por tum’e, pero mester ta un adicto pa esey.
El a acerca instancianan y francamente no tin opvang. A papia cu Marieta Wanopa di Cruz Cora, y tampoco no tin luga. No tin shelter na Aruba pa opvang hende den necesidad. Desde awo ya e ta bayendo casi un aña pa pidi ayudo. Tin empleadonan di e ministerio di asuntonan social cu ta yud’e, pero lo principal, ainda e no por haya nada.
Hopi a priminti, pero no a haci ainda nada. Riba Facebook mes, un conoci di dje for di San Nicolas, a haya un trailer pa un siman pa biba aden. E mes ta sclamando pa lunanan largo y te ainda e no a haya nada. E mester a sali dia 11 di Juli caba. Nan a ontslag’e pa prome biaha, pero door di no tin caminda di bay, nan a want’e. E ta gradicido cu nan por a want’e un luna extra, pero awo atrobe nan a dun’e ontslag, cual ta diamars.
El a manda peticion atrobe riba facebook. A haya hopi hende cu ta papia, ta show, pero al fin y al cabo nada. Te ainda no sa kico pa haci, si tok’e pa sali mañan, p’afo di hospital e lo sinta, dilanti cu tur su cosnan of check un lift, y bah’e na bestuurskantoor of departamento di Sociale Zaken pa wak kico por haci’e p’e. E no tin caminda di bay. E ta pidi tambe un fabor, pa no huzg’e por nada. E no ta un criminal y no a mata ningun hende. Tambe pa por fabor stop di puntra cuenta di famia. E so ta luchando riba e mundo aki. Su mama y tata no tey mas. E mester di ayudo. El a pidi y si no por yuda cu un dak, yud’a pa hisa bijstand pa e por tin un caminda di keda.Cu loke e ta haya ta riba 500 of 600 florin. Y logicamente e tin di come di dje. Si nan por hisa su bijstand of dun’e un dak. Pero al fin y al cabo, nada. E ta ripara tambe otro prioridadnan ta bin na prome luga. Bo show y saca potret. Al fin y al cabo, segun e lema tabata e Ser humano ta Central, pero den ki sentido.
