E muchanan di Aruba a haci un bon papel na Bogota durante Rok Cup Challenge Panamericano na Bogota y a sa di bay cu varios premio. Por a gana mas premio, pero tabata tin algun situacion cu a presenta cu no por a bay cu tur premio.
Den e chikitonan a logra gana premio.
Gregory Tromp ta vocero di e team y a splica cu por ta no a yega cu e premio maximo, pero ta un di e paisnan di mas lihe di full e evento. Tur bista tabata riba e pilotonan. Ora cu ta wordo invita na un paisina, semper cos por bay bon, cos por bay malo. A haya accidente den e categoria di mas halto cu tabata tin. Aruba tabata posiciona riba number dos. A sali te ultimo y despues a logra den di cuater luga. Ta un logro hopi grandi. Awo ta look forward pa futuro.
Intencional
E accidente tabata uno intencional y e causnte a wordo penalisa. Pero el a sosode y awo tin cu wak pa futuro.
Bista pa futuro
Aruba lo bay tey pa e proximo caredanan. Parti di e delegacion ta keda na Bogota pa haci preparacionnan pa otro siman. Tin algun prueba cu algun team a pidi cu e pilotonan di Aruba. Tambe pa October lo tey na Bogota atrobe, segun Gregory Tromp.
Haguen Orman riba podium
E hobencito Haguen Orman a sa di saca cara di Aruba. E tabata un di e coredornan cu mester a tene cuidao cun’e. El a conta cu e ta hopi contento cu e premio cu el a haya. El a conoce varios amiguito nobo na Colombia. Haguen sigur a enfatisa cu e lo sigui core, pero e kier bay core den otro pais, no solamente na Colombia. Haguen tin un curashi grandi di a core riba un pista cu tabata mucha, aunke cu su tata a pidi’e pa no haci’e. Asina mes el a sa di destaca. Poco poco e ta bay core cu auto cu mas velocidad.
Tata di Haguen lo sigui stimul’e. E ta hopi orguyoso di dje. Di dia cu el a drenta den e kart, e no por a sak’e mas. Como tata ta stimul’e te caminda cu por. E tabata por a bay Colombia, cu ayudo di tur e Arubianonan cu a bin Colombia, tambe ayudo di e team na Colombia y tambe di e famia. A bin y a logra. Un, dos of tres riba podium, esey tabata e meta.
Team ta sostene
E deporte aki ta uno solitario. Ora ta riba pista, bo ta bo so. Abo tin cu tuma decision si bo ta bay duro, si bo ta coy e bocht, si bo ta bay slow. P’afo di e pista ta unda cu tin cu stimula e team. Pa Haguen tambe, pa e sinti cu e ta forma parti di un team, cual ta hopi importante.
E mucha gusta e deporte, e ta gusta e speed, e ta gusta e premionan y si kier gana premio, mester pone speed. A hera number uno, pero pa e proximo biaha, nan lo logr’e sigur sigur.
Wowonan tabata riba Aruba
Mathew Paesch ta un di e pilotonan cu a bay representa Aruba na Colombia. El a comenta cu a cuminsa den top 5. Tur dia tabata bayendo bon. E prome heat a haya cu un problema chikito unda cu a haya un accidente y a cay te patras. Sinembargo e proximo heatnan a bay hopi bon. Nan a cuminsa te ultimo auto, pero a logra yega toch di cuater luga. Si tabata tin mas buelta, por a coy di tercer puesto. Aunke no ta loke a bin pe, pero toch a logra bin te di cuater. Tabata tin e speed di un number un. Paesch a conta cu su speednan tabata keda consistente. El a keda lucha y a yega te na di 4 luga. E persona cu a sak’e afo den un di e caredanan, no tabata mucho sportief. Aunke, segun Michael, tur caminda cu bo bay por haya tipo di e cosnan aki, pero el a keda positivo cu su posicion. El a keda hopi satisfecho con e careda a bay.
Te awor aki e proximo careda grandi planea ta na Las Vegas na November. Un palabra di pabien ta bay na Michael Paesch cu su papel na Colombia y tambe na Haguen Orman cu su premio.
