“Despues di hopi esfuerso negociando cu autoridadnan Mericano, nan a otorga un General License 7a pa nos refineria por continua cu fase 2″, asina Minister Presidente Evelyn Wever-Croes a informa awe mainta. A para Fase 2 abruptamente ora sanccionnan Mericano a blokia e fondonan necesario dos siman pasa, cu consecuencia cu mester a retira hopi empleado.
Autoridad Mericano awor a aproba pa kita e blokeo riba e sumanan ey pa fase 2 por continua y pa por tuma empleadonan bek na trabou. Awor Gobierno di Aruba ta den deliberacion cu CITGO pa mira con por ehecuta e General License 7a.
Minister Presidente Evelyn Wever a subraya cu “Nos no a yega ainda, pero nos ta riba e bon caminda. Un otro logro importante di nos Gobierno cu ta creando confiansa bek den Aruba. Nos ta sigi lucha te ora tur trahado di e refineria por yega pia di trabou bek!”
Lamentablemente, mientras Minister Presidente ta papia awe mainta di un logro di Gobierno di Aruba, ayera departamento di “Treasury” di Gobierno Mericano a anuncia cu a duna CITGO un total di 18 luna mas pa por sigui opera y cumpli cu su debenan. A extende e licensia pa permiti e compania pa paga 71 miyon dollar na interes na PDVSA 2020 Bonds cu mester paga na luna di april proximo. E tempo ey un parti di CITGO a para garantia pa e “bondnan” aki.
Pues ta un decision cu Gobierno di Merca a tuma pa wanta CITGO den operacion, contrario na e informe emiti awe mainta pa Minister Presidente Wever cu ta un logro di Gobierno di Aruba, basa riba negosacionnan!
