Diabierna ultimo e team di Rotaract Club of Aruba a bini hunto pa paketa tur articulo di scol y asina finalisa nan proyecto anual di ‘Back To School project’ 2021. E proyecto aki tin como meta pa yuda nos muchanan bishitando scolnan basico na diferente districto rond di Aruba cu e materialnan di scol pa asina habri un aña escolar cu confiansa.
Durante ful e luna di juli, miembronan di Rotaract Club of Aruba tabata staciona na Dyon Center tur diasabra for di 9:00 am pa 2:00 pm pa colecta e articulonan di scol pa nos muchanan. Diabierna ultimo, e team di ‘The Back To School Project’ a bini hunto pa finalisa e proyecto cu nan ‘Packing Night’.
Durante e anochi ameno aki, a paketa tur e materialnan di scol den cada tas cu a keda ricibi como donacion di e comunidad di Aruba completo.E boluntarionan di Rotaract Club of Aruba, siguientemente, a percura pa reparti tur e tasnan yena cu e articulonan di scol pa nos muchanan.
Esaki ya caba ta e di 29 edicion di ‘The Back To School Project’ – un proyecto organisa pa Rotaract Club of Aruba su miembro y boluntarionan, hunto cu famia y maestronan. E aña aki e meta ta pa facilita mas di 150 mucha di 4e, 5e, y 6e klas bayendo scol na diferente partinan di Aruba cu articulonan di scol – entre otro uniform, potlood, pen, schrift, tas y mucho mas.
Rotaract Club of Aruba ta gradici Aruba y tambe tur nos partnernan pa e cooperacion y sosten. Hunto nos a haci e projecto aki un realidad. Keda pendiente pa un reportahe detayando e impacto di e resultado. Masha danki un biaha mas na tur cu den un forma of otro a yuda nos yuda nan. Finalmente, na tur studiante, Rotaract Club of Aruba kier desea bo un feliz vakantie y exito pa e aña escolar den porta.
