E turista Greg Kochanov di New York, a yega Aruba diasabra ultimo. El a biaha cu su yiu muhe chikito y su famoso popchi, cu nunca ta faya. A nota cu for di nan yegada ayera, constantemente e ta publica potret di e popchi disfrutando di nos isla. E ta haci esaki uzando e pagina riba Facebook conoci como “Aruba – One really happy island”, cu tin no menos di 31.1K miembro afilia.
A crea e pagina na october 2016 pero durante pandemia, na augustus 2020, a cambia su nomber y a bira hopi mas activo y interactivo. Ta nota hopi interaccion entre turistanan y nos localnan, den cual ta lansa pregunta riba nos isla y ta haya contesta instantaneo. Tambe nan ta probecha di comparti experiencianan a base di potret of video di paisahenan, experiencia den restaurantnan of riba tournan. Tin biaha ta critica tambe ora cu e servicio of producto no ta alcansa e calidad desea of priminti.
Famia Kochanov obviamente ta gosando masha di nos isla y nos ta desea nan un dushi vakantie y spera di mira nan bek pronto riba nos “one happy island”…of tambe…”where happiness lives”.
