Manera cu 24ora.com a informa di simannan pasa caba den forma di primicia y cu Ronnie van Trigt a desmenti na nos, awe Dr. Horacio E. Oduber Hospitaal mes a confirma cu e lo fungi como “Interim Lid Raad van Bestuur Bedrijfsvoering”. Asina el a drenta como Crisismanager, nombra dor di Gobierno y awo a tuma henter mando over di e organisacion, den un esfuerso pa tuma e trabou over di Ezzard Cilie y pas’e pa un otro Director cu lo mester tuma funcion ainda.
Den pasiyonan ta mencionando nomber di Gregory Croeze, e actual Director Financiero di IMSan, cu lo bay ocupa e puesto di Director Financiero di Hospital. E ta tuma e funcion cu antes tabata di Theo de Kool. Parce cu a tuma un Hulandes, esta Freek Korver como Director di Cuido. E intencion ta pa Ronnie van Trigt, como e homber di confiansa di Gobierno, por maneha e traspaso di e Raad van bestuur bieu pa esun nobo.
Tambe Ronnie van Trigt lo mester atende e reto di cambio di Hunta di Supervision. Gobierno a pidi e miembronan pa nan tuma nan retiro y parce cu tur, sino mayoria, a cumpli cu e peticion di Gobierno. Pero maneha un Hospital no ta facil, pasobra ta un organisacion cu riba mil empleado, bou construccion, cu retonan di construccion andando, retonan den cuido medico y asina por sigui menciona. No ta un asunto di kita un hende awe y mañan su reemplasante por cuminsa…mester un traspaso apropia pa evita stagnacion.
Awe mainta Ronnie van Trigt a haya un rondleiding cortico den Hospital y mañan mainta lo cera conoci cu gerencia di Hospital. Ronald van Trigt ta bini di sector priva, como doño di Total Cleaning, e tin amplio experiencia den maneho di companianan, specialmente e parti di bedrijfsvoering. E tabata Presidente di ATIA y a fungi tambe den diferente Hunta di Supervision na ATA, SVB y tambe AZV.
Durante e periodo nos dilanti lo tuma luga e traspaso di informacion y tur esaki ta sosode den bon cooperacion cu e Hunta di Directiva actual. Ronnie van Trigt ta desea di crea claridad durante e siguiente lunanan pa continuacion di Hospital como organisacion. Hunta di Supervision y empleado Hospital ta yama Ronnie van Trigt….bonbini!
