“Aruba Tourism Authority ta lamenta e sucedido di ayera nochi y ta manda palabra di condolencia pa famia di e fayecido. Mientras autoridadnan concerni ta investigando e caso aki, nos kier enfatisa cu siguridad tanto di nos bishitantenan como di nos comunidad ta keda un prioridad pa nos tambe como Oficina di Turismo”, asina Ronella Croes a reacciona riba nos pregunta awe, relaciona cu e asesinato cu a tuma luga den e zona turistico. Aunke cu no ta un turista ta envolvi, e autoridad di turismo ta preocupa cu e area aki ta bou tension di crimen.
“Conhuntamente cu socionan, a traves di entre otro e Aruba Hospitality and Security Foundation, lo sigui traha pa percura pa mas siguridad, visibilidad y presencia di miembronan di siguridad den area turistico”, asina Ronella Croes a termina bisando.
Awe marduga pa 1:25. am a sosode un caso di tiramento dilanti Baru Lounge (ex-Sand Bar) dilanti e hotelnan high-rise na Palm Beach. Aki a asesina e homber Anthony Carty di 31 aña di edad. Keto bay no a detene e autor di e crimen, aunke tin un mucha homber di 17 aña deteni como un persona di interes den e caso aki. Ta resalta e presencia di arma di candela den comunidad y e nivel di violencia cu ta biba bou di nos hobennan. Ta un asunto preocupante cu autoridad tambe ta reconoce, ora cu a anuncia un campaña pa entrega arma di candela sin persecucion penal. Pero, en bes di entrega arma, e hobennan awor ta opta pa uza arma y asina ta sosode dos caso di asesinato cu arma tras di otro.
Hopi hende no ta realisa cuanto placa y esfuerso organisacionnan manera Aruba Tourism Authority ta inverti pa por atrae e turista pa bin bishita nos isla. Pa algun hoben malcria daña nos imagen asina y haci nos isla insigur, ta un asunto inaceptabel y henter comunidad mester duna di nan banda pa nos bolter e fenomeno aki, denuncia tur cu tin un arma y asina haci nos isla mas sigur atrobe.
