Diadomingo merdia a drenta informe cu KIA tabata den estado di alerta ya cu tres preso a huy for di e instituto. No mucho despues, a informa cu e gara tur tres preso y transporta nan bek pa KIA.
Den un conferencia di prensa awe mainta, minister di husticia, Rocco Tjon, a splica cu for di diadomingo e ta den contacto cu e instituto y a elogia e trabou di tur esunnan na KIA, esunnan di CEA y sin lubida cuerpo policial. El a splica cu el a ricibi e reportahe di e suceso y a bisa cu ta e bon colaboracion y e procesonan ta locual a conduci na e resultado aki, pues cu a logra captura e presonan bek “den tempo record.”
Esaki un biaha mas ta mustra e restonan grandi cu KIA ta enfrenta, Tjon a enfatisa, splicando cu ta trata aki di e parti infrastructural, e parti di material y di otro banda adaptacion legislativo cu lo mester tuma luga. Segun el a sigui splica, ex-minister di husticia, Andin Bikker, ya tabatin un concepto di ley na DWJZ pa por percura cu e echo cu un preso ta purba huy ta castigabel pa ley cu un castigo basta halto tambe. Segun e mandatario, nan ta en espera pa un contesta pa por trata esaki den parlamento. Den cuadro di esaki, tambe tin den tapara pa bolbe manda un carta pa Hulanda pa bolbe acentua e importancia di yega na un instituto correctional nobo.
Pa un relato mas amplio, lesa bo proximo edicion di TREMPAN.
