Diabierna mainta e defensa di Robbie dos Santos, esta Peppie Sulvaran, a logra convence Huesnan cu no tin motibo pa mantene su cliente cera.
Porfin nos a logra, tabata e prome palabranan di Peppie Sulvaran na pia di e trapi di edificio di Corte. “Robbie ta contento y spera cu e cos aki no pasa cu ningun otro hende,” Sulvaran a bisa.
Ta normal cu por detene un hende ora cu tin sospecho, pero mientras mas tempo pasa, mester tin motibonan mas pisa pa sigui prolonga e detencion. Y den e caso aki no tabatin ningun diferencia cu e prome dia di detencion. “Nan a coy Robbie cera pornada,” e Abogado a bisa. Segun el a splica ta di dos bes OM ta tira un para den caso di Robbie dos Santos. Despues cu e nomber di dos Santos a wordo menciona, nana trata di sigui construi riba esaki. A bringa riba e imagen, ya cu a crea dos Santos manera un sospechoso, cu e ta envolvi pa pago di asesinato di Helmin Wiels, pero no tin prueba di esaki.
Pafo di Corte tabatin hopi hende para, sperando resultado di e caso aki. A informa cu Robbie dos Santos mester pasa den e procedura di documentonan prome cu por lague bay. Intecion awo ta pa manda un carta pa OM pa para e abuso, aunke cu OM a bisa cu nan a anuncia dia 17 di februari kier hiba Robbie dos Santos Corte. Pero Huesnan mes a bisa awo cu no tin prueba. “E caso aki ta un berguensa pa Corsou, cu testigonan spirito. Husticia aki riba no ta funciona pero a haya tres Hues cu curashi. Awo ta spera cu OM sali bisa cu e caso contra Robbie dos Santos a caba.” Awo cu Robbie a pasa den esaki, sperando cu tur cos a caba, mirando cu Jamandolin ta cera riba testigonan cumpra, nan ta bay lucha pa sak’e liber. “E tambe lo mester bay cas tardi of tempran.”
