E siman aki un barco cu 36 indocumenta a yega Aruba. Pocopoco e tipo di embarcacionnan aki ta birando mas y tin preocupacion riba esaki. Bureau Rampen Bestrijding Aruba (BRA) tin cu sinta cu Ministerraad pa discuti riba e hisamento di nivel 3, pa loke ta trata e parti di capacidad.
Rino Hermans, director di BRA, a splica cu den e ultimo dianan aki, a intercepta dos lancha. E cantidad di persona abordo tambe ta aumentando. Antes nan tabata entre diesdos pa diescinco hende, pero awo ta riba 30. Pa loke ta e capacidad na Warda Nos Costa, a renoba eynan door di a amplia e capacidad. Esaki ta un crisis di Venezuela cu ta bin desde 2006, unda cu BRA ta atende cu esaki. Tin dia e ta hopi alarmante y otro momento pasivo. E biaha aki e tabata alarmante.
Den tempo di covid tabata momento pasivo. E aanlandingnan cu tabata tuma luga ta manehabel, cu excepcion di e siman aki unda intercepta dos lancha cu capacidad basta grandi. Pa loke ta trata e capacidad na Aruba, pa awo tin esey compara cu antes. Pero, Warda Nos Costa a bisa di ta riba su edge y ta desea por ta coordina na nivel nacional. Tin hopi otro partner cu tambe tin proceso durante e aanlandingnan aki.
Hermans a indica cu nan a evalua si ta necesario pa schaal op. Nan ta haya necesario pa bay Ministerraad riba e echo cu mester aumenta. Ya caba ta riba nivel 1 y nan kier pidi Ministerraad pa bay na nivel 3. Aki nan ta obliga di informa Ministerraad riba e aansturing di e incidentenan aki riba nivel tactico, nivel di maneho. Ainda nan no a sinta cu Ministerraad riba kico ta bay bira rib’e maneho di Aruba strategicamente p’e situacion aki.
Diaranson Ministerraad a bay di acuerdo cu e proposicion di BRA pa maneha e situacion aki na nivel 3. Aki tin mas partner cu ta bini hunto y coordina, pero tambe sostene Warda Nos Costa den e situacion aki.
