Ta practicamente henter Aruba a tuma nota di e noticia publica riba www.24ora.com, unda cu Minister di Integridad Ursell Arends a sinta bebe cerbes den un bar y despues subi e auto di gobierno pa bay cas. Pero ta parce cu tur e politiconan cu ta forma parti di e coalicion di gobierno, esta MEP y Raiz, kier manera “beat around the bush” pa evita di expresa nan mes directamente riba e tema.
Tanto Prome Minister como awo e Presidente di MEP, a prefera pa laga e persona en cuestion, esta Minister Ursell Arends mes papia riba e tema. Den e conferencia di fraccion di MEP dialuna mainta, tabata presente entre otro Ricky Hoek, presidente di MEP. “Riba e nota aki nos por ta hopi breve.
Nos tambe a tuma nota di e noticia cu a sali di e minister cu tabata dal dos drinks y a core bou di influencia. Den e caso aki mi ta sugeri pa boso tuma contacto personalmente cu ne pa mira kico ta su punto di bista.”
Sinembargo como politico e tin un mensahe pa tur hende eyfo. Den e temporada aki di celebracion di carnaval, unda tur hende ta disfruta di e cultura, ta conseha pa disfruta sanamente y conscientemente di alcohol. Esta no bebe y bay stuur of si ta stuur no bay bebe. E mes si ta su so, ta bebe maximo un cerbes si e ta bay sinta tras di stuur. “SI mi bebe mi lo no sinta tras di stuur y mi no ta conseha niun hende haci esey.”
