Den un esfuerso pa atende e demanda creciente di vivienda accesibel y pagabel p’e adultonan mayor, Fundacion Cas pa Comunidad Arubano (FCCA), cu orguyo a inaugura oficialmente Residencia Blenchi. Situa n’e ex-compleho di Perle d’or na Boegoeroei 11, e residencia nobo aki ta dedica exclusivamente n’e comunidad di 55 aña bay ariba.
E decision di converti e compleho aki den un residencia pa adulto mayor, ta bin di e comprension di FCCA riba e necesidad constante di vivienda adecua p’e grupo ak. Segun Jessica van Montfoort-Posner, funcionario di mercadeo y comunicacion di FCCA, e lista di espera ta revela cu 49% di e personanan cu ta pidi pa vivienda ta adulto mayor di 55 aña bay ariba y 79% di nan ta busca apartamento di un camber. Cu 48 apartamento di e tipo aki, Residencia Blenchi ta presenta como un solucion ideal pa un solo persona of pareha den e etapa di bida aki.
Esaki no t’e prome proyecto di FCCA pa adulto mayor na Aruba, cu cinco residencia ya den funcionamento riba e isla. E iniciativanan aki ta busca pa crea ambiente trankil y central cu ta promove e bienestar di e residentenan.
E beneficionan di Residencia Blenchi ta multiple. Fuera di su renobacion rapido y costo rasonabel, e ta ofrece comodidad cu ta mehora e calidad di bida di e residentenan, manera un hardin bon cuida, un gazebo amplio y un piscina. E ubicacion strategico cerca di establecimento comercial importante ta facilita ainda mas e bida diario di e residentenan y ta permiti e posibilidad di expansion futuro dentro di e compleho.
E exito di e proyecto aki no lo tabata posibel sin e esfuerso conhunto di varios parti envolvi. FCCA ta gradici tur contribuyente, for di e contratistanan te cu e empleadonan di FCCA mes, pa nan trabao duro den e realisacion di Residencia Blenchi.
Jessica ta enfatisa e compromiso contino di FCCA, di proporciona vivienda accesibel y pagabel pa tur, promoviendo asina un ambiente saludabel y e bienestar di comunidad. Cu mas proyecto na horizonte, FCCA ta sigui firme den su mision pa satisface e necesidadnan di vivienda p’e Arubianonan di tur edad.
Fuera di brinda un hogar accesibel y comodo, Residencia Blenchi tambe ta concebi como un espacio cu ta fomenta e interaccion social y e bienestar emocional di su residentenan. E diseño di e compleho ta inclui area comun, cuidadosamente planifica, manera un gazebo grandi, caminda cu e residentenan por reuni, socialisa y participa den actividad recreativo. Fuera di esey, e ekipo di woon en wijk beheer di FCCA ta comprometi pa organisa evento y programa cu ta promove e participacion comunitario y e enrikecimento personal di e residentenan.
Cu un ubicacion strategico cerca di e servicionan y comodidadnan importante, manera Do-it Center y Save More, Residencia Blenchi ta ofrece su residentenan e conveniencia di tin tur loke nan tin mester na nan alcance. E proximidad n’e instalacionnan comercial esencial no solamente ta facilita e acceso na producto y servicio, sino cu tambe ta promove un mayor autonomia y calidad di bida p’e residentenan di e comunidad.
Mirando pa futuro, FCCA ta comprometi pa sigui expande su oferta di vivienda accesibel y pagabel na Aruba. Cu proyecto adicional den desaroyo, e organisacion ta decidido pa satisface e necesidadnan cambiante di e poblacion, sigurando cu tur e Arubianonan tin acceso na un hogar sigur y comodo. Cu Residencia blenchi como ehempel destaca di su compromiso, FCCA ta sigui desempeña un papel crucial den e mehoracion di e calidad di bida di e comunidad y den e promocion di e bienestar pa tur generacion.
