Dia 5 di januari 2024 BOB Aruba a tene un “New Year Stakeholders Cheers” pa yama 2024 bon bini y pa gradici tur stakeholders pa nan aporte na e programa di screening pa detecta cancer di pecho na tempo. Tambe ta desea di informa pueblo tocante e plannan di 2024 y futuro.
Durante e evenemento miembronan di e fundacion a presenta e desaroyo di BOB Aruba y den cua direccion e fundacion ta bayendo. BOB Aruba su mision ta pa evita tratamentonan innecesariamente extra invasivo door di deteccion di cancer na pecho na tempo. E balor agrega di e programa aki ta e calidad di bida despues di tratamento como tambe e aumento di añanan saludabel pa nos hende muhenan cu un deteccion na tempo. Esaki ta mas cu claro den interes colectivo pa e pueblo di Aruba.
Desde 2019 estadistica ta duna di conoce cu tin un aumento den participacion na e programa di screening di pecho. Esaki ta principalmente danki na e reaccion positivo di pueblo ariba yamadanan (di BOB) di telefon, unda cu antes tabata manda carta solamente.
Ademas a amplia den capacidad di BOB Aruba su tecniconan, unda cu awor por screen mas cliente pa dia y tambe por screen pafo di ora di oficina, den oranan di atardi te cu 7:00 PM y ariba diasabra mainta. Interesante pa menciona ta cu e total cu BOB Aruba a referi na dokter di cas pa haci mas investigacion ta entre 3 pa 5 %. Esaki ta un estadistica aceptabel y comparabel cu estadisticanan internacional.
BOB Aruba ta gradici tur su stakeholders cu ta yuda y colabora cada dia cu e mision di BOB Aruba. En special ta gradici: UO-AZV, HOH, DVG, HAVA y demas fundacionnan contra cancer na Aruba: KWF, Mary Joan, FCCP, y CORESA. Colaboracion pa continuamente conscientisa pueblo tocante deteccion na tempo y prevencion ta sumamente importante y ta wordo haci den union cu entre otro e fundacion nan menciona y mas.
Den 2024 BOB Aruba ta planea pa continua y expande ariba tur colaboracion existente. Adicionalmente e aña aki BOB Aruba ta prepara pa implementa un Sistema di maneho di dato mas avansa, conhuntamente cu RADventure Group. Esaki na su turno lo facilita control di e calidad di e programa di screening, ehecuta door di LRCB (Landelijk Referentie Centrum voor Bevolkingsonderzoek Nederland).
Danki na e experiencia cu BOB Aruba tin cu e programa di screening di cancer di pecho, ta forma parti di e comision cu ta traha riba e expansion di programa di screening na Aruba. Na Augustus 2023, a lanta un comision informal yama: “Uitbreiding Bevolkingsonderzoek”, cu ta un colaboracion entre BOB Aruba, HOH, CORESA, AZV, DVG y HAVA. E meta di e comision aki ta pa den 2024 studia, evalua y concretisa e posibilidadnan pa ampliacion di e programa di screening di Aruba.
Un danki ta bay na tur cu ta aporta pa Aruba yega na mas programa nan preventivo cu por detecta cancer mas tempran posibel.
Den un ambiente festivo nos a habri 2024 cu hopi animo, posivitismo y energia pa continua nos trabou incansabel cu hopi amor pa e comunidad di Aruba.
