E maestro di gymnastieknastiek Emerlindo Robles de Medina ta deteni. Diabierna el a keda deteni bou sospecho di a comete acto inmoral cu un menor cu tabata bay Sagrado Curason na Savaneta. E hoben awe ta teenager y den man di profesionalnan na Hulanda a conta kico a pasa cu ne algun aña pasa. Awe e menor ta bibando cu su mayornan na Hulanda. Su comportacion a causa cu mayornan a busca ayudo profesional pa nan yiu. Asina e mucha a conta ki tur a pasa cu ne algun aña pasa ora e tabata bay scol na Savaneta. Famia a keda den shock. Cu e carta di profesionalnan e mayornan a haci denuncia na Aruba algun siman pasa. E caso a cuminsa cana.
Logicamente e miembronan di JZP ta tuma tur declaracion y analisa tur cos. Djey ta manda e material pa Ministerio Publico. Eynan fiscal ta mira loke cu tin y ta tuma un decision. Den e caso aki fiscal a duna ok pa detene Emerlindo Robles de Medina cu ta e maestro di gymnastiek na Sagrado Curason na Savaneta. E maestro aki ta conoci hasta di ta biaha cu menor den exterior ora di competencia. A kere cu nan lo detene na yegada di un di e biahenan. Finalmente a deten’e diabierna y a cuminsa cu un interogacion leve. Diadomingo tambe cu presencia di su abogado a interoga e sospechoso Emerlindo Robles de Medina. Pocopoco lo cuminsa presenta tur loke cu tin como material pa asina e responde riba nan. Pa awo ta un solo keho tin contra e maestro. No sa si den e proceso lo aparece mas denuncia. E comportacion di e maestro ta algo cu den pasado caba a yega di ring e bel.
Un stagiaire cu no a gusta e forma cu e maestro tabata atende cu e menornan a yega di avisa IPA. E stagiaire na su turno a ser movi di e scol. No ta e so como stagiaire. Un otro stagiaire tambe a mira e comportacion raro di e maestro pa cu e alumnonan. Parce e maestronan aki tambe a ser yama aden di parti autoridad. Aki por mira cu ni maske e stagiaire di IPA a redflag e comportacion no apropia cu el a mira, nada a pasa. Si no tin suficiente material y ta solamente un keho, e por complica y haci e caso poco suak. Laga mira con e cos lo sigui cana.
