Partidonan den coalicion a trece un mocion dilanti di cual su contenido ta completamente contrario na loke a wordo treci dilanti den e disertacion nan. Nos no ta diferencia di opinion na momento cu nos mester defende y protehe nos derecho di autodeterminacion.
Integridad di nos autonomia mester por keda manteni na tur momento y relacionan den Reino mester ta basa riba respet mutuo. “E contenido di e mocion cu e fraccion MEP a trece dilanti ta totalmente contrario di loke nan a wordo treci dilanti den e reunion,” Parlamentario Richard Arends a bisa ora a pidi’e su reaccion riba declaracionan di lider di fraccion di MEP y e atake nan directo contra Hulanda y CAft
A sali den prensa cu e mocion di e partidonan cu ta sostene e coalicion ta pa sirbi ‘como un mensahe cla pa Hulanda’. E mocion ta bisa cu e cuadro legal pa un supervision financiero mester sigui despues di aña 2019 y cu supervision financiero mester ta segun e normanan acorda. Parlamentario Arends a splika cu e unico normanan cu e sa di dj’e ta esunan cu a wordo presenta recientemente den un reunion di Parlamento cu Prome Minister. E normanan nobo ta consisti di un deficit di -3% y -0.5% pa añanan 2018 y 2019 sigui pa un surplus di +0.5% y +1.0% pa añanan 2020 y 2021. E mesun normanan aki a wordo treci den e reunion cu Caft y e Comision Fiho pa asuntonan Financiero y Economico di Parlamento. “Mi no sa ki otro mensahe por saca afor,” Parlamentario Arends a bisa.
Den e reunion Gobierno a bisa cu e normanan di deficiti pa e añanan nos dilanti ta basa riba acuerdonan cu a yega caba di Hulanda. Sinembargo Gobierno no a duna detaye con ta subtancia esaki. “Esaki ta e unico informacion cu nos a haña. Nos no sa kico ta e otro condicionnan poni riba mesa, of otro puntonan di acuerdo cu a yega na nan. Otro normanan mi no ta na altura di dje, por lo menos nan no a wordo treci dilanti den e reunion di Parlamento.”
E mocion a crea tambe e impresion cu e ley di supervision financiero ta contra Statuut. Parlamentario Richard Arends a referi na su motivacion na momento di vota unda e tabata hopi cla y a referi cu e ley di supervision financiero y e coneccion cu Conseho di Minister di Reino ta den linea cu articulo 52 di Statuut. “Gobernador tin e obligacion pa anula un ley cu ta en pugna cu Statuut, nos Consitucion y tratadonan internacional. Esaki no ta e caso cu e ley di supervision financiero cu ta na vigor for di aña 2015”. Ley di supervision financiero a wordo traha a base di consehonan di expertonan riba derecho constitucional y relacionan den Reino manera Kees Borman y Mito Cros (dfm).
Unico violacion cu tabatin ta cu pa presupuesto 2018 a pone e ley di supervision un banda pa aumenta e deficit, expande e gastonan y p’asina alarga e proceso pa yega na un presupuesto balansa y reduccion di debe. Mi ta kere cu Gobierno mester caba su negociacionnan cu Hulanda y bolbe Parlamento y duna su splicacion. Parlamento no ta un instituto cu ta co-goberna, pero ta un instituto cu ta controla Gobierno y ta co-legislador. Parlamento tin ultimo palabra ora di cambionan di ley, pero nos no mester bay sinta riba stoel di Gobierno. Gobierno mester hasi su trabow y bin Parlamento y presenta e cuadro financiero nobo, Parlamentario drs mr Richard Arends a mustra.
