Diamars mainta, partido RED Democratico a tene un conferencia di prensa caminda nan a toca varios tema.
Un di e temanan cu Ricardo Croes, lider di e partido a trece dilanti tabata e cantidad di mortonan inespera cu ta sosode den e ultimo temponan y sin niun motibo. Hopi di e fayecidonan tabata deportista, hendenan cu no tabata tin problema algun di salud.
Croes a cuestiona e echo cu te ainda niun politico di niun partido politico ta cuestiona e echo aki y tampoco e parlamentarionan. Con por ta posibel cu Minister di Salubridad no ta manda haci un investigacion di kico ta e causa di tur e fayecimentonan inespera aki? Segun Croes, esaki ta un fenomeno rond mundo y no na Aruba so. El a sigui bisa cu no mester pensa mucho leu, ya cu for di 2020 pa awo, ta un solo fenomeno tabata tin y esey tabata e famoso vacuna. No mester play kens cu esaki ta causa p’e vacuna y sigui haci manera cu nada ta pasando. Ora c’un gobernante tuma un decision pa su poblacion, e mester para responsabel p’e tambe
Si tin e fenomenonan aki, mester laga investig’e, Croes a indica. No gaña skirbi riba e rednan social cu e pueblo mester come mas saludabel of practica mas deporte. Pero ta parce cu niun mandatario no kier mira e realidad. Tin algo cu ta tumando luga… Con por ta posibel cu tin asina tanto fayecimento repentino? Te hasta deportistanan ta kita cay muri durante practica di nan deporte preferi.
Morto repentino
Morto repentino, yama Sudden Death na ingles ta un morto cu no ta causa door di violencia of trauma. No tin un splicacion cientifico pa e causa di morto. Hopi biaha ta relacion’e cu un paro cardiaco, es decir, e curason a stop di bati repentinamente. Un fenomeno cu semper tabata t’ey presente, pero den e ultimo temponan e ta mas visibel cu nunca y particularmente den personanan cu no tabata tin historia di problema cu curason.
