A pesar cu tin 5 vuelo humanitario a bandona Aruba aña pasa caba y un e aña’ki, ainda tin mas vuelo na caminda mirando e cantidad di personanan cu Guarda Nos Costa ta detene. Ta papia aki specificamente di e vuelo pa Venezuela.
Richard Krammers, cabes di Guarda Nos Costa (GNC) a splica cu nan a sigui cu nan trabou e aña’ki. Sigur un biaha pa luna nan ta tira algun razzia y semper ta gara personanan di cual mayoria no por demostra cu nan tin papel legal. Sea nan no tin permiso di trabou y nan no tin un permiso pa ta aki na Aruba tampoco.
Riba e mas reciente vuelo humanitario a bay mas o menos 80 persona, kendenan tabata deteni of a haya un “meldingsplicht”. E resto di personanan aborda ta Venezolanonan cu kier a bandona e isla den forma boluntario. Segun Krammers, nan ta planea pa tur luna tene un accion y despues un vuelo humanitario. Pero el a enfatisa cu nan no ta “jaag” riba Venezolanonan. Hecho ta cu mayoria di esnan indocumenta aki na Aruba ta procedente di Venezuela. Pero tambe nan ta haya personanan di nacionalidad Chines, Colombiano, Dominicano, Hondureño, etc. Tur e otro nacionalidadnan ta yega nan pais riba un vuelo indirect.
Pa loke ta e gastonan, esaki ta core pa cuenta di gobierno si ta un persona cu nan a detene riba caya. Pero tur esnan cu kier bandona Aruba di un forma boluntario, ta paga tur nan gastonan. Esnan cu nan deporte ta en general personanan cu a yega via di aeropuerto, pasando via di un otro pais cu no ta Venezuela. Tin di e ciudadanonan aki no ta di acuerdo cu ta bay deporta nan y nan por bay Corte y di esaki tin un 16 persona cu ta spera riba nan apelacion.
GNC tin dos compleho, uno na Centro di Detencion na Dakota y e otro na aeropuerto unda cu tabatin e facilidad di FOL. Aworaki entre e dos sitionan aki tin espacio pa cera entre 80 pa 85 persona, pero tin plannan di renobacion y ampliacion den ehecucion pa cual por bisa cu denter di algun tempo, lo tin espacio pa 160 persona.
Krammers ta masha contento cu e cooperacion cu nan ta ricibi di diferente instancia, cuminsado cu ministerio di Husticia, sigui Polis, DIMAS, etc., pa nan por cumpli cu leynan di admision y expulsion.
