Diabierna pa mas of menos 12:30 pm, un pareha turista tabata di bishita na Grot di Lourdes. Parce cu un turista masculino lo a dal un stap pa subi trapi pero a faya y trompica. E homber a resulta herida.
E señora cu tabata compaña e victima a avisa autoridad mesora pa por brind’e asistencia. No menos cu dos patruya di polis a presenta na sitio y papia cu nan.
Mesora a solicita presencia di ambulance na e sitio. Paramediconan a brinda asistencia medico n’e turista herida. Separa di a cay duro y herida su mes, mas bien e tabata hopi spanta tambe.
Tocante Grot di Lourdes
Siendo gran mayoria di nos isla ta catolico, dia 11 di februari 1958 a celebra e hecho cu tabatin aparicion di imagen di Mama Maria na Lourdes na Francia. E tempo ey pastoor Erkamp di e parokia di San Nicolas a bin cu e idea pa pone un imagen di Maria, cu ta pisa 700 kilo, den un grot situa na Sero Preto na San Nicolas. Monsigneur Holterman a bendiciona e grot cu e imagen den dje dia 11 di februari 1959. Desde e dia ey e grot di Lourdes a bira un luga conoci pa catoliconan por resa den tur trankilidad of pa cende un bela na nomber di esunnan cu a fayece prome cu nos.
Anualmente, riba dia 11 di februari, ta organisa un procesion cu ta sali for di misa Santa Theresita na San Nicolas pa e Grot di Lourdes.
