Prome Minister mr. Evelyn Wever-Croes a confirma ayera na sindicatonan durante e reunion na Cocolishi, cu e “aanwijzing” pa Aruba ta riba agenda di Conseho di Minister di Reino Hulandes riba dia 26 di augustus 2022. Ta e prome reunion despues di reces (vakantie). Cu esaki gobierno tin un luna mas pa mira con toch por cumpli cu CAft y Gobierno di Hulanda pa asina evita e instruccion.
E liña cora cu ta core den e asunto aki tin di haber cu boluntad y forsa politico pa cumpli cu promesanan haci. Den e caso aki no ta “djis un promesa” sino un protocol formal firma entre Gobierno di Aruba representa pa nos minister-president y Gobierno di Hulanda representa pa Secretario di Estado (e tempo ey Raymond Knops). Eyden Gobierno di Aruba a acorda un lista di asunto, bisando cu lo cumpli.
Pero awor, separa cu no ta logra cumpli, ta bin e escenario nobo cu Parlamento di Aruba ta purba torno na e acuerdo door di presenta amiendanan. Esey ta pone presion riba e protocol y ta laga gobierno mustra malo dilanti Hulanda. Ta parce e ora cu no tin sosten politico, o sea cu minister-president a acorda algo cu e no tin sosten politico p’e na Aruba. Cu su mesun partido ta haci cambio na e areglo, cu ta pone cu, den cierto forma, ta parce un “brevet van onvermogen” di Parlamento riba e Prome Minister. Tipo di movecion politico asina awe tin Hulanda preocupa y ta forsa Aruba pa toch cumpli cu loke a acorda.
No ta prome biaha cu ta bay un peticion pa Conseho di Minister di Reino Hulandes pa duna Aruba un “aanwijzing”. Den carta fecha 24 di september 2019 caba CAft a skirbi: “De overheidsfinanciën en het financieel beheer van Aruba zijn niet op orde. Het land neemt onvoldoende maatregelen om tot duurzame verbetering van de overheidsfinanciën en een daling van de personeelslasten te komen. De afhankelijkheid van incidentele baten is te groot en de noodzakelijke hervormingen worden onvoldoende opgepakt. De schuld van Aruba is daardoor onnodig toegenomen. Het College Aruba financieel toezicht (CAft) voorziet diverse risico’s en acht aanvullende maatregelen noodzakelijk om te komen tot duurzame overheidsfinanciën, zoals beoogd met de LAft en het met Nederland overeengekomen protocol van 22 november 2018.”
Den dicho carta, na final, prof. dr. Raymond Gradus a skirbi cu no ta rest’e ningun otro opcion mas cu conseha e Conseho di Minister di Reino Hulandes pa duna henter Conseho di Minister di Aruba un instruccion. E ta admiti si cu ta keda na Conseho di Minister di Reino pa dicidi si e instruccion ta bin of no. Tambe el a repasa e forma con esaki ta bay, den cual prome cu duna un instruccion, cu ta duna Conseho di Minister di Aruba e oportunidad pa duna nan vision riba esaki. E tempo ey, na aña 2019, a opta pa no duna e “aanwijzing” mas debi cu Aruba a priminti di lo haci e cambionan necesario. Awe, nos ta casi tres aña mas leu, pero na e mesun crusada ainda, pa cual e pasenshi di Gobierno di Hulanda obviamente ta cabando.
