E operadornan di compania a blokia caminda dilanti di Bestuurskantoor mustrando nan mal contento di a cera e buraconan pa coba graniet. Nan a sinti cu minister di infrastructura Otmar Oduber buscando pa yega na un solucion.
Despues di e reunion e companianan ainda tabatin e caminda blokia pa scucha kico tur a sali for di esaki. E team di negociado a haya splicacion riba y prome cos cu a bisa nan ta cu e chauffeurnan di truck no mester worry, pasobra nan no mester pidi ‘aanleg vergunning’ mas.
Tambe nan mester mira kende ta bende e material of importa material cu nan mester, pero tambe ken por haya un ‘aanleg vergunning’ na e momentonan aki. Pero a base di esaki nan por sigui opera pa un tempo cortico. Tur esaki ta depende na kico nan por papia cu gobierno pa lag’e habri pa mas tempo.
Gobierno tin e idea pa cera tur mina na Aruba, pero e companianan ta di opinion cu esey no mester.
A bin cu un acuerdo unda lo lanta otro siman un comision special cu representante di e operadornan di companianan pa papia cu gobierno. Lo purba convence gobierno cu no mester cera tur mina, segun Patrick Boset di Cala Romana.
Algun minanan ta cera, pero tambe tin cu ta habri y otronan cu lo bay habri bek. E companianan lo por sigui eherce nan trabou y no mester di un permiso.
Pa loke ta rosamento di tereno p’e trabou por sigui mester di un ‘aanleg verguning’ y por haya esaki na DIP, cual nan lo haya esaki den maximal 30 dia. Den e parti di tiramento di sushi tin un situacion di cual algun hende a ripara cu Serlimar ta uzando prijsnan cu no ta exactamente husto, manera cu e negoshinan aki ta haya.
Minister a duna nan un garantia cu lo bay mira e asunto aki di biaha y ta bay haci cambio. Esaki ta nifica cu si e compania ta rosa y tira sushi na Serlimar, tur hende ta haya mesun prijs. El a sigui bisa cu nan mester sigui tira bista riba e parti ey pa cosnan aki no sigui pasa. Tambe tin algun cos cu nan no por a yega na papia, pasobra ora cu gobierno lanta e comision mester haci un bon estudio.
Loading…
Reload document 
Open in new tab Tin cu bay mira tur cos den e ROP, pasobra a tira hopi cos cu tin di haber cu ley. Segun Patrick Boset nan abogado tampoco no sa hopi y esaki ta di haber cu nan no a yega na un solucion ainda. Tin e sensacion cu gobierno ta pusha un tiki, pasobra nan sa e ley ainda. “No kiermen cu esun contra ken nan ta lucha, nan no sa ley ainda”, el a bisa. Loke mester haci ta studia e ley bon, studia bon e ROP, mira nan derecho, esun cu tin derecho den naturalesa por pidi un mudamento di e tereno, un permiso di tereno of un daño di perhuicio. Por haci tur esaki pero e ta a base di ley. Patrick Boset ta kere cu esey mester ta un tiki mas cla, pasobra nan ta bezig desde november 2017 caba y awe a haya sa cu tin hopi solucion.
Ainda tin e derecho pa sigui cu e lucha, unicamente mester sa kico nan ta representa kico mag di haci pa por duna pan nan famia. No lo rindi y si algo no ta husto, esey lo lucha pa nan. Esey ta loke tur hunto mester para tras di dje, pasobra cada uno tin un causa diferente pero na final e ta pa tur hende tambe.
PUNTONAN DI MANIFESTACION
Segun Wedras De Souza di Leblon N.V. na momento di a sinta cu minister a pasa riba varios punto di e manifesto.E cabesnan di comisionnan lo sinti hunto pa atende e puntonan. Den e puntonan menciona na minister ta habrimento di cununco, producto di Aruba cu mester uza nan. Ya sa caba cu den nan parti tin e pensamento di trece producto di afo cu no por perhudica esunnan cu ta cumpra y bende. A splica gobierno cu si bay trece producto di afo, tin compania grandi so lo previligia di esaki y esey ta esun cu tin e monopolio. E companianan chikito no tin esaki, el a expresa. E compania grandi cu ta importa ta competi cu e companianan chikito, pasobra nan tin truck chikito.
TIRAMENTO DI SUSHI
Pa loke ta e parti di tiramento di sushi, Serlimar ta sali y haci un competencia cu no ta fair ariba caya. Esaki ta pa motibo cu Serlimar tin un prijs mas abou cu nan. Segun minister, e no ta kere cu Serlimar no a ricibi hopi tereno pa rosa, pero e companianan cu ta rosa tereno no ta di acuerdo cu loke e minister a bisa. Den e reunion cu minister lo trece e punto aki dilanti. Minister ta dispuesto pa sinta y combersa pa no trece competencia inhusto. Un ehempel cu Wedras De Souza a duna ta si ta cobra 350 pa truck pero e compania mester paga pa ton pa tira sushi mientras Serlimar ta por nada.
E minister a bisa cu mester bay DIP y aplica pa un ‘aanleg vergunning’. E formulario aki ta pa tur esunnan cu ta rosa y minister a bisa cu Marilyn Kock lo por yuda nan cu yenamento di e permiso pa rosamento. El a expresa cu si pa ora tin algo nan tin e papel cu nan. Tur esaki ta puntonan cu e companianan mester discuti pa asina por trece dilanti cerca minister durante e reunion.
