Tabata desde 2018 caba, apenas algun tempo cu Chris Romero a asumi e puesto di Minister di Transporte, cu mesora el a opta pa sigui peticion di famia y amigo den Servicio Meteorologico di Aruba y a manda Marck Oduber cas. No por kita for di e percepcion cu esaki ta persecucion politico, pasobra no tin ningun carta of rapport traha contra e hefe di departamento, den cual por discuti riba su conocemento, experiencia of forma di maneha. E unico realidad riba mesa ta cu a castiga un famia di e ex-minister pa sabotahe den e departamento.
Fuentenan a indica na nos cu bou di e gobernacion di MEP-POR-RED el a demanda gobierno caba pero cada biaha atrobe ta hunga e wega di rek e proceso di “ter beschikking” y a pone sinta na UNESCO, aunke no tin trabou specifico p’e. Pa colmo, e mesun gobierno a haya cu e ta asina bon, cu nan a paga y a dun’e un studieopdracht pa e bira un doctor, pues a obtene su PhD na Universidad di Maastricht.
Dia 14 di december 2020, Marck Oduber a defende su tesis como un novum y conforme deseo di Minister di Enseñansa, Ciencia, y Desaroyo Sostenibel, dr. Rudy Lampe, a hacie online via Universidad di Aruba hunto cu Universidad di Maastricht. E titulo di e disertacion tabata “The Impact of Selected Natural Factors on Tourism Demand- The Case of a Small Island Destination”. Den e estudio a investiga e relacion entre diferente factor natural cu tin efecto riba un isla turistico. E estudio a enfoca principalmente riba factornan di clima (termino corto y largo), salud (dengue) y vegetacion.
Pero awor, aunke cu el a sigui studia y a promove den titulo, keto bay e ta na cas ta cobra y sin por traha y eherce su funcion, siendo e unico Meteorologo na Aruba. Ex-minister Romero a opta di paga un consultant for di Corsou pa ocupa e posicion di Marck Oduber pa e ultimo añanan. Awor Minister Ursell Arends, cu recien a huramenta como Minister di Transporte y Integridad tin e batata cayente aki den man pa regla. Sea ta wanta un profesional y e unico meteorologo acredita na Aruba sinta un banda y sigui paga un consultant un salario den luga di laga e profesional haci su trabou.
Nos a compronde cu dia 1 di november 2021 e decision di ex-minister Romero ta caduca, pues lo ta den man di Minister Ursell Arends cu si e ta bolbe firma un decreto gubernamental pa wanta un Rubiano abou of e ta laga Oduber tuma su funcion bek. E caso den Corte lo tin sentencia net un siman prome cu e fecha di prome di november, pues hues probablemente lo adelanta riba e decision di Minister Arends y duna un indicacion den ki direccion Corte lo bay despues di e decision di gobierno.
Ultimamente CAft y COHO a indica na mas di un ocacion caba cu mester stop di paga consultants vooral ora ta infunda y tin profesional den cas pa eherce e trabou. Cu scarsedad di placa den presupuesto y presion pa baha e gastonan di salario den e aparato gubernamental, no ta imagina cu lo ta un decision “integro” pa wanta un Rubiano cu gobierno mes a paga pa e sigui studia, sin lag’e traha trankil. Nos lo sigui e desaroyo aki masha di cerca e simannan aki, pasobra de lo contrario tin minister lo ranca sali heredando casonan den Corte pa cu maneho di e gabinete anterior.
