Reunion awe tardi
For di president di sindicato SEPPA, Magaly Brito a compronde cu directiva di SKOA a yama un reunion cu tur nan empleadonan di limpieza pa awe diaranson pa 3’or di atardi. Indicacion ta cu, durante e reunion aki, SKOA lo informa cu e comision cu a keda instala na februari ultimo pa yega na un solucion, no a logra su obhetivo y minister di enseñansa ta insisti cu henter e grupo aki tin cu haya nan retiro.
Ta trata aki di casi 90 empleado, asina yama ‘werkster’ cu ta traha na e diferente scolnan cu ta resorta bou di Stichting Katholieke Onderwijs Aruba. E carta emiti pa director di SKOA, Anueska Baly, ta di caracter urgente y obligatorio y lo tuma luga na sala di sede di SIMAR na Seroe Blanco. Posteriormente cabesantenan di scolnan lo keda informa y lo mester fiha nan posicion pa cu esaki y/of haci e ahustenan necesario.
E consecuencianan di e decision aki lo tin su repercusion den e sector di enseñanza ya cu SKOA ta maneha e cantidad mas grandi di scolnan riba e isla, atendiendo miles di alumno y rond di sheteshen docente. Pues pa augustus ya tin un nubia scur ta colga riba enseñanza, segun Brito a indica. E apertura di aña escolar ta den wega.
Si gobierno ta keda para riba nan punto, e obligacion y derechonan di e empleado lo bira responsabilidad di SKOA, cu na su turno no tin e fondonan necesario pa cumpli cu e pagonan di retiro y lo mester solicita pa declar’e den bancarota. No ta descarta cu ainda, mañan mainta lo por bolbe trata e tema aki pa di ultimo biaha den Conseho di Minister pa mira si por yega na otro desenlace.
E situacion di e empleadonan di limpieza di scolnan cu ta resorta bou di SKOA ta uno cu tin mas di un aña andando. Na comienso di februari 2020 e grupo di trahadonan aki a realisa nan prome protesta cu Minister di Labor, Glenbert Croes a atende pa scucha nan preocupacion.
Un luna despues mester a bolbe protesta dilanti di edificio di gobierno caminda Prome Minister Evelyn Wever-Croes a duna di conoce cu lo intermedia cu Minister di Enseñansa pa yega na un solucion. Den luna di mei, Parlamentario Alan Howell a indica cu e no lo permiti pa kita e trahadonan aki di trabou.
Na februari di e aña aki, atrobe e trahadonan a haya nan obliga di bay bati na porta di gobierno. Na e ocasion ey, Conseho di Minister a bay di acuerdo pa crea un comision cu ta consisti di representante di trahado, ministerio di Asuntonan, DRH y di Labor. A propone pa den dos siman di tempo bin cu proposicion caminda ningun trahado mester perde su trabou. Cuater luna a pasa sin ningun informacion, mientras tanto cu Gobierno a cay y campaña ta andando. Tres dia prome cu eleccion ta lansa e bomb aki.
