Pa mas cu trinta aña caba Aruba tabata pensa di fortifica su esfuersonan pa salud mental bao di un solo dak. Pa por haci cambio den e sistema di cuido, mara na mas inversion, mas personal y pa trata mas pashent. Aruba tabata canando hopi atras compara cu otro islanan den region, incluyendo Corsou, Boneiro, Cuba, Merca y Hulanda tambe. Dos aña pasa den AZV mes, den hospital mes y den grupo di psikiatranan a dicidi cu no por sigui mas y a crea un “project groep”.
“A base di e plan ey, a funda Resaldo y AZV a cera un contract cu nos. Mi mes tabata traha na AZV e tempo ey” asina drs. Lex de Jong, miembro di e Raad van Bestuur di Respaldo a conta. A percura pa aloca fondo adicional pa e proyecto aki. Desde aña pasa Aruba conoce Fundacion Respaldo, cu mesora traduci den mas cuido, mas personal y menos tempo di espera pa topa cu un psikiatra, compara cu antes. Desde e aña aki a tuma policlinica infantil y hubenil over, mescos tambe clinica Respaldo, unda ta ofrece tratamento na adultonan.
Te cu tres aña pasa, tabatin 3 pa 4 psikiatra na Aruba. A acorda cu AZV cu lo emplea 7 psikiatra, esey ta nifica 2 pa mucha y hoben na luga di 1, pues a redobla e cantidad. Y a amplia cuido pa adulto cu teamnan ambulante, cu ta bay na e pashent unda cu nan ta, segun de Drs. Lex Jong. Fuera di esey a crece den mas personal di cuido, psicologonan, trahadonan social y tur otro terapistanan, a crece cu mas of menos 30 trahado. En total a bay di 55 trahado den cuido mental prome cu dia 1 di Januari, pa mas o menos 100 empleado na fin di e aña aki.
Enfermedad mental tin consecuencia social, di salud y financiero. Socialmente e pashent ta bira victima di discriminacion y stigmatisacion. Den salud ta pronostica cu pashentnan ta biba 15 aña menos y tin tres biaha mas chens pa haya problema cu curason. Depresion ta normal cerca 20% di e pashentnan. Financieramente e pashentnan ta limita na opcion laboral. Ta conta cu 4% di nos Producto Bruto Nacional ta sufri pa motibo di retonan mental. Na tur ta papia di 200 miyon florin!
Cu lantamento di Respaldo, Aruba awo ta riba e rumbo corecto pa brinda mas y miho cuido di salud mental. Pa por hisa e nivel di cuido, a opta pa no inverti den edificionan grandi y caro, manera un clinica di 100 cama. Pero na su luga a promove mas servicio ambulante, cu ta e trahadonan cu ta bishita pashentnan na cas. Cu un bon plan y bon maneha, Respaldo ta convenci cu lo evita cu mester interna pashentnan of interna nan pa un tempo largo. Asina sigui opera cu e mesun capacidad actual di 40 cama cu tin den e clinica, cu por logra e mesun resultado cu paisnan den region.
Cu binimento di Respaldo e tempo di warda pa un cita pa ricibi tratamento di salud mental a baha drasticamente. Clinicanan ta miho ekipa, cu mas personal, en bes di interna pashentnan ta promoviendo mas cuido na cas, mientras cu ta conscientisa comunidad mas riba salud mental.
Desde aña 2017 e prome trabounan a inicia pa funda Fundacion Salud Mental Aruba, RESPALDO, den cual a uni servicionan y organisacionnan bou e mesun fundacion. For di 55 trahado cu a inicia cune na un principio, ta spera di alcansa 100 trahado na fin di e aña aki of comienso di otro aña. Tin dos policlinica disponibel, un pa adulto cu 40 cama disponibel y un pa mucha y hobennan. Desde 1 di augustus 2017 e fundacion ta conta cu un Raad van Bestuur, cu ta inclui Dr. Hendrikus van Gaalen como Director Medico y Presidente, hunto cu Drs. Lex de Jong como Director di Operacion.
