Den e luna di November 2017, e cantidad di placa den circulacion a baha cu Afl. 23,2 miyon te na Afl.4.151,2 miyon, compara cu October 2017.
Esaki a wordo causa door di un caida den e reserva di divisa netto (-Afl. 30,9 miyon) y un subida den e activo domestico netto (+Afl. 7,8 miyon). E expansion den e activo domestico netto ta debi na un aumento den credito domestico (+Afl. 20,0 miyon), cual a wordo parcialmente mitiga pa un bahada den transaccionnan no relata na credito (-Afl. 12,2 miyon). E subida den credito domestico ta relata na un crecemento den credito bancario na e sector priva (+Afl. 21,1 miyon), mientras cu credito bancario netto na e sector publico a baha (-Afl. 1,1 miyon). E caida den transaccionnan no relata na credito ta mas tanto relaciona cu transaccionnan di clearing.
E expansion den credito bancario na e sector priva a resulta door di mas credito na empresa di (+Afl. 11,3 miyon) y hipoteca pa vivienda (+Afl. 11,0 miyon). Di otro banda, credito na consumidor a nota un bahada di Afl. 1,2 miyon. Credito bancario netto na e sector publico a baha principalmente door di un subida den depositonan di gobierno (+Afl. 1,3 miyon). E bahada den e reserva di divisa netto di e sector bancario a resulta for di benta netto di divisa na publico (-Afl. 234,3 miyon), principalmente relaciona cu importacion di mercancia, transferencia netto pa cuentanan den exterior di companianan local, otro servicionan y e asina yama “income accounts”. Esaki a wordo parcialmente mitiga pa compra netto di divisa for di publico (+Afl. 203,3 miyon), primordialmente relaciona cu entrada for di turismo, servicio di transportacion y inversion directo. Inflacion E nivel general di prijs, cu ta wordo midi door di e indice di prijs di consumo, a registra un bahada di 0,9 porciento den e luna di November 2017, compara cu November 2016. E contribuyente principal na e caida aki ta e componente “Vivienda”, cual ta debi primordialmente na un reduccion den prijs di electricidad. Otro componentenan cu tambe a registra bahada ta e componentenan “Recreacion y Cultura”, “Mobilario” y “Restante Bienes y Servicio”.
Di otro banda, e componentenan “Transporte”, “Educacion”, y “Restaurant y Hotel” a registra un subida. Si exclui e componentenan di cuminda y energia for di e indice di prijs di consumo, inflacion a mustra un aumento di 0,1 porciento compara cu November 2016. Pa loke ta trata e promedio anual di e tasa di inflacion, esaki a baha di 0,4 porciento na October 2017, pa 0,5 porciento na Novemmber 2017.Turismo Na November 2017, e cantidad di turista a registra 86.064 bishitante, cual ta 7.442 bishitante (+9,5 porciento) mas cu na November 2016. E crecemento aki a resulta principalmente door di un expansion den e mercado Norte Americano di 7.958 bishitante (+15,1 porciento), cual a wordo parcialmente mitiga pa un reduccion den e mercado Latino Americano di 879 bishitante (-5.7 porciento). E subida den e mercado Norte Americano a resulta principalmente door di mas bishitante for di Merca (+7.6231 bishitante of +15,4 porciento). E caida den e mercado Latino Americano a wordo causa primordialmente pa menos bishitante for di Venezuela (-1.375 bishitante of -17,0 porciento), parcialmente mitiga pa subidanan den bishitante for di Brazil (+465 bishitante of +43,3 porciento), Argentina (+269 bishitante of +19,2 porciento) y Colombia (+241 bishitante of +10,8 porciento).
E cantidad di turista crucero a registra un crecemento di 26.416 bishitante of 33,9 porciento te na 104.242 bishitante na November 2017, compara cu November 2016. E cantidad di barconan a expande for di 38 na November 2016 pa 51 na November 2017. Entrada di Gobierno Na November 2017, entrada di gobierno a suma Afl. 90.0 miyon, cual ta Afl. 13,2 miyon menos compara cu e mesun luna di e aña anterior. Esaki a resulta for di bahadanan den tanto entrada di impuesto (-Afl. 8,1 miyon) como entrada no relata na impuesto (-Afl. 5,0 miyon). E caida den entrada di impuesto ta relata principalmente na menos entrada for di impuesto riba ganashi (-Afl. 20,1 miyon) y riba e asina yama “overdrachtsbelasting” (-Afl. 2,8 miyon). E bahadanan aki a wordo parcialmente mitiga pa mas entrada for di accijns riba gasoline (+Afl. 5,3 miyon), impuesto riba entrada (+Afl. 4,9 miyon), benta di negoshi (B.B.O.) (+Afl. 1,8 miyon), impuesto riba importacion (+Afl. 1,5 miyon) y impuesto riba entrada (+Afl. 1,2 miyon).
