Diaranson merdia na sede principal di Setar ubica na Serie Blanco, a tuma luga e coronacion oficial y entrega di premio na tres di e ganadornan di Festival di Dande 2020. Miembronan di Comision Promove Cultura y representantenan di Setar tabata presenta pa ricibi y homenahea e ganadorna, cu pa motibo di tabata den exterior, no por a keda corona y premia prome cu awe.
Esaki ta e di dos corona pa Jason Kelly, kende a gana pa prime biaha na 2007. El a aplica cu p’e tabata un experiencia nobo, esta di e festival virtual, pa cual e ta gradici e organisacion pa e esfuerzo cu nan a haci. “Nos ta orguyoso pasobra no a laga e cultura di Aruba cay atras,” Kelly a bisa. Asina mes, el a confesa di a haya hopi falta di e publico mes, cu p’e, ta e parti mas emocionante y loke e ta gusta mas. E mensahe di su dande tabata pa pueblo di Aruba ricibi e bendicion cu lo guia nos tur. 2020 tabata hopi duro y den 2021 nos ta sigui prospera den nomber di Dios.
Reina di Dande 2020 ta Veloushka Krozendijk. Su experiencia tabata uno sigur diferente. E ta conta con a entrena cu e grupo djis un biaha prome cu e festival, y a presenta sin publico. E mensaje di su dande ta “pa nos ta mas uni y hiba Aruba dilanti pa resalta e cualidadnan di Aruba y carga esaki bay dilanti.” E ta desea tur hende un bon aña 2021 sigur hopi positivo pa sigui bay dilanti y sigui celebra bida.
Adicional na e Rey y Reina grandi di Dande. Tambe a corona y entrega premio na e Rey di Dande den categoria infantil (4-6 aña), esta Jaymerson Kelly. Pabien na e monarcanan di Dande 2020.
