Aña pasa cu e potret di mi nieta Sarah Hickman – Harms a sali riba kaft di e Ice Hockey Official Rules and Casebook mi a conta su historia como hungador y como referee di ice hockey den un articulo cu a wordo publica den cortantnan local.
E siman aki, Sarah ta agrega un capitulo nobo y interesante na su historia. El a wordo contrata pa guia tres wega di e Canadian Women’s Hockey League (CWHL). E weganan, entre e ekiponan Calgary Inferno y Shenzhen KRS Vanke Rays, lo tuma lugar na Shenzhen, China, den e Shenzhen Dayun Arena cu ta forma parti di e Shenzhen Universiade Sports Centre. E centro deportivo aki a wordo completa na augustus 2011 pa e Summer Universiade di e mes aña. Sarah ta programa pa referee por lo menos dos di e tres weganan.
Shenzhen Dayun Arena ta wordo uza pa basketball, gymnastics y ice hockey. Cu un capacidad di 18 mil persona, e arena ta sede di Shenzhen KRS Vanke Rays, anteriormente yama Kunlun Red Star WIH di e Canadian Women’s Hockey League.
National Hockey League di Merca a presenta un wega amistoso entre Calgary Flames (di Canada) y Boston Bruins den e stadion aki september aña pasa.
E weganan e siman aki ta programa pa diaranson dia 20 pa 7:30am, diabierna dia 22 tambe pa 7:30am y diabierna 23 pa 4:30am. (Oranan di Aruba). Por mira tur tres wega riba www.cwhl.com/watch.
Sarah ta yiu di Dr. Stephen Hickman y Ruth Harms (Arubiano di nacímento) y e ta nieta di e autor aki. Ami ta un abuelo hopi orguyoso.
Sarah cu su mayornan 
Shenzhen Universiade Sports 
