Nacemento y estudio Edgar Joaquin Vos mihor conosi como Watty a nace 16 di augustus 1937, na Weststraat 16 den Rancho e bario historico di piscadornan di Playa. Su persona tabata e di cuatro for di cinco jui di e pareha Salomon y Genoveva Vos-Tromp. Como studiante Watty a bai St. Dominicus College na cual scol el a hanja su MULO- diploma, tambe e tabata tin diploma di adjunct- commies y abogado.
Deporte
Watty tabata un ex internacional di Aruba y Antillas Hulandes den e ramo di futbol. Como miembro di seleccion di futbol di Antillas a logra na Cuba medaya di plata despues di Costa Rica. Na Puerto Rico durante di e weganan Centro Americano y di Caribe representando Antillas e seleccion a logra medalla di plata despues di Mexico. Formando parti di e selecionnan tanto di Antiyas Hulandes, Aruba of di e club Aruba Jrs. Watty a hunga futbol entre otro na Suriname, Salvador, Costa Rica y Jamaica. Na Aruba su persona formando parti di e seleccionan menciona Watty a hunga futbol entre otro contra equiponan di Brasil (Bangu, Fluminense), Bolivia, Peru, Ecuador, Colombia, Venezuela, Inglatera (Arsenal). Watty semper a milita den e club local Aruba Jrs.
Musica, social y sindicalismo
Watty tambe a sa di gosa di fama como musico durante década di añanan 50 y 60 di siglo pasa como integrante den e conhunto Los Duques cual conhunto a sa di gosa di un popularidad enorme na Aruba cual a pone tambe cu nan worde contrata pa e inauguracion di Aruba Caribbean Hotel. Watty tabata fungi como drummer, cantante y manager. Watty tabata vicepresidente di Jaycees di Antillas Hulandes y miembro di directiva di Toastmasters di Aruba den cual organizacion ela forma su mes e.o. como orador publico. Watty ta fundador di e prome directiva y di Centro di Barrio di Playa Pabao. Como tambe tabata presidente di sindicato di empleadonan di gobierno di Aruba, esta A.N.A.A.B, awendia SEPPA.
Empleado publico y abogado
Watty pa varios aña a cubri e posicion di sub- hefe di e departamento di Domeinbeheer. Su persona a fungi como abogado tambe y como tal a labora na e oficina Gonzalez, Zielinski y Gibbs.
Politica
Watty ta co- fundador di partido MEP, fundador di partido RUBA, cual despues na 1982 a uni forza cu partido AVP, partido cu Watty a keda miembro te cu su fecha di fayecimiento. Watty a haci su debut den politica na anja 1971 ora cu su persona hunto cu sr. Betico Croes (q.e.p.d.), sr. Daniel Leo (q.e.p.d.) y sr. Efrem de Kort (q.e.p.d.) a funda partido MEP. Desde su debut den politica y te na eleccion di 1997 cual porcierto tabata e ultimo eleccion cu Watty a participa, semper ela worde escogi cu votonan preferencial.
Durante su carera den politica Watty a ocupa e siguiente puestonan; 1971- 1973 miembro di eilandsraad, december 1973- december 1975 minister di husticia y vice premier di Antiyas Hulandes den gabinete Evertsz, mei 1976- februari 1977 diputado y alaves miembro di eilandsraad, 1977- 1985 miembro di eilandsraad, 1 januari 1986- februari 1989 minister di husticia di Aruba den gabinete Eman I, februari 1989- september 1994 miembro di Staten, 1 september 1994- 6 januari 2001 minister di husticia y obras publico di Aruba den gabinetenan Eman II y III
Algun di e tanto projectonan sea personal of a forma parti di nan
16 di augustus 1975 despues di hopi contratempo Watty a sali victorioso, y a inaugura scol di polis na Aruba, cual porcierto desde 16 di augustus 2002 ta carga su nomber. Na september 1975 Watty tabata lider di e delegacion di Reino cu a delibera cu Venezuela e frontera maritimo entre Reino Hulandes y Venezuela. Tambe su persona como e unico politico di oposicion (R.U.B.A.) a forma parti di e delegacion Arubano consistiendo di gobierno insular di Aruba, sindicato y comercio y lidera pa sr. Betico Croes (q.e.p.d.), cu a biaha pa Hulanda despues di e sucesonan di augustus scur na 1977.
Tambe Watty tabata miembro di e comision di Reino cu tabata atende cu e relacionnan estatal dentro di reino Hulandes, esta e intereilandelijk topoverleg, Antilliaansspoor. Como tambe miembro di e delegacion Arubano na e dos conferencianan di mesa rondo na Den Haag, Hulanda, na 1981 y 1983. Na unda cu a fiha e futuro structura estatal di Aruba, cual resultado final tabata e status aparte.
Condecoracion y reconosimento
Casi 30 aña Watty a sirbi e isla aki como politico, y sin lubida su aporte for di hoben caba riba e terreno di futbol, musica, social y sindicato. Tanto den politica como den e cuerpo ehecutivo y legislativo tanto di Antillas Hulandes como esun di Aruba, varios ta e posicionnan clave cu Watty a sabi di eherce cabalmente, pa cualnan tambe varios ta e condecoracionan cu e la ricibi tanto for di Casa Real Hulandes como for di gobierno Venezolano. Aki na Aruba gobierno a honrele cu e scol di polis na su nomber, cual porcierto Watty a funda na 1975 y e ringweg 3 cu originalmente a carga e nomber Avenida E.J. (Watty) Vos, awendia E.J. (Watty) Blvd, cual caminda porcierto riba termino corto lo ta den total uso.
