Cantidad di asegurado di Banco di Seguro Social (SVb) cu ta “meld ziek” semper ta varia. Pero riba e dia di awe a kibra record di tur e biahanan cu hende a yama pa bisa cu nan no ta bay traha, pa motibo di ta malo. Ta trata di un total di 1.161 persona cu a meld ziek na Sociale Verzekeringsbank (SVb). Mayoria di nan a bisa cu tin sintoma di Covid 19 of di e variante Omicron, cu tin parecido na griep y cu nan no ta capas di presenta na pia di trabou (AO).
Di e 1161 aseguradonan cu a laga sa di no por traha awe, un total di 953 a meld AO online mientras 208 a hacie telefonicamente. Siman pasa, esta aña pasa den siman di Pasco, e cantidad a yega na un record di 526 melding di AO via e sistema online. E record di awe ta surpasa e record anterior, cu no menos di 635 persona extra cu a meld, pues mas cu dobel! Como regla di SVb, compania ta cubri e prome dos dianan di AO, mientras e otro dianan ta cubri pa SVb.
Costo: Cuart miyon florin!
Mirando e cantidad di trahado cu ta meld AO pa motibo di Covid-19, DVG a cambia e maneho y a informa cu un persona contagia ta bay den isolacion pa solamente cinco dia. E prome dos dia, trabou mes ta cubri, pero e resto di dianan (3) ta cay bou SVb. E dianan cubri p’e SVb ta bay costa nan 250 mil florin pa cubri tur e pashentnan aki cu a meld ziek awe. Y esey no ta tur, pasobra no ta awe so tin hopi yamada, sino di e ultimo simannan caba, cu ta causa un gasto adicional pa e fondo di enfermedad di SVb.
No mester meld ziek ora di cuarentena
Mester menciona cu net den e dianan di fin di aña, SVb a informa cu debi na e aumento di e casonan di Covid-19 y conhuntamente cu esaki e aumento di personanan den isolacion y cuarentena, SVb a adapta entrante diaranson 29 di december 2021 su servicionan pa loke ta trata notificacion di cuarentena. E situacion actual a pone cu e telefon pa comunica cu SVb su callcenter ta congestiona. Pa remedia e situacion aki y pa por atende cu e congestion, SVb ta pidi tur persona cu ta poni den cuarentena door di DVG pa raporta esaki directamente na su doño di trabao. No mester notifica SVb di su cuarentena.
E doño di trabao lo notifica SVb di su empleado cu ta den cuarentena. Control di cuarentena mandatorio lo sosode door di SVb y DVG. Esaki lo yuda tene e liñanan telefonico menos congestiona pa personanan cu mester notifica AO pa Covid-19 of otro enfermedad. Si un trahado haya sintoma y test positivo pa Covid1-9 durante su cuarentena e mester notifica AO. Por meld AO online via di e website https://ao.svbaruba.org. Haci esaki di dialuna pa diabierna di 7:00 AM pa 3:00 PM. Den weekend, dianan di fiesta y ATV di 7:00 AM pa 9:00 AM. Por meld na telefon 527-2782 di dialuna pa diabierna di 7:00 AM pa 12:00 PM y di 1:00 PM pa 3:00 PM. Den weekend, dianan di fiesta y ATV di 7:00 AM pa 11:00 AM.
E doño di trabao cu instrui su trahado pa traha for di cas ta liber di haci esaki ya cu e persona den cuarentena, no ta malo. Ora di notifica AO online of via di telefon mester tuma bon nota di e instruccion cu ta keda duna pa e dianan siguiente. SVb a pidi tur asegurado pa tene cuenta cu e situacion di e pandemia y cu ta haciendo nan maximo esfuerso pa atende clientenan di e miho forma posibel.
Tocante SVb
A funda Banco di Seguro Social Aruba (SVb) di 1 di januari 1986, asina cu pais Aruba a nace oficialmente. Nan ta sigura aseguradonan pa cinco diferente producto. Nan ta:
- Seguro general di behes (AOV)
- Seguro general di viudo(a) y orfandad (AWW)
- Seguro di enfermedad
- Seguro di accidente
- Seguro di cesantia
Awe, SVb ta raporta di tin no menos cu 35.253 persona sigura den nan fondo di seguro di enfermedad, pa cual ta paga ora nan keda cas malo. Esey ta menos di normal, mustrando cu ainda tin hopi hende sin trabou y consecuentemente sin un seguro social. Por menciona cu dia 1 di januari 2020, dos luna prome cu pandemia, tabatin 36.254 trahado sigura. Ora pandemia a dal na maart 2020, a nota cu dia 1 di januari 2021 e cantidad a baha te na 33.789 trahado sigura. Dia 1 di december 2021, pues un luna pasa, e tabata na 35.243 y awe, algo mas di un luna despues, el a subi solamente cu dies trahado adicional. Pero keto bay basta menos si compara januari 2020.
Di otro banda, e fondo di pensioen tin 22.040 pensionado cobrando tur luna, cu ta mas cu prome cu pandemia. Cobrado di pensioen di viudo tambe ta na 1797 cu ta mas cu prome cu pandemia. Esunnan sigura pa accidente na trabou ta na 40.055 trahado cu tambe ta menos prome cu pandemia. Contrario na locual bo lo pensa, awe SVb tin 4251 doño di trabou inscribi, cu ta mas di locual tabatin na januari 2020 prome cu pandemia (3807).
SVb a informa cu na aña 2020 nan tabatin 113 trahado den servicio y cu cuater oficina, situa den Vondellaan, na San Nicolas, na Sun Plaza y na Eagle.
