Dia 23 di augustus ultimo CAft a reacciona riba e di dos rapport di Gobierno di Aruba relaciona cu resultado di e prome mita di aña 2018. CAft a cuminsa pa menciona cu nan a haya e rapport na tempo for di Gobierno pero ta keda preocupa cu entre otro entradanan di winstbelasting y grondbelasting ta kedando atras. CAft ta menciona tambe den su reaccion cu no ta mira decisionnan concreto for di Gobierno pa baha e gasto nan di personal manera palabra.
A palabra cu lo baha e gastonan di personal cu Afl. 12,2 miyon den 2018 pero no a tuma ningun paso concreto te ainda pa haci esaki. Lo mester bay atende esaki den e di dos mita di aña pa por logra baha gasto. E efecto di e medidanan aki mester bira visibel den e di tres y di cuater rapport di Gobierno na CAft. CAft a menciona cu nan lo kier mira di awor caba kico ta e decisionnan concreto di Gobierno cu lo conduci na bahamento di gasto di personal pa no surpasa Afl. 470,7 miyon den aña 2018.
E entradanan den su totalidad ta yega un suma Afl. 668,3 miyon. Loke ta resalta ta cu e extra atencion di DIMP pa cu recuperacion di cobransa riba tereno di winstbelasting y grondbelasting ta kedando atras. A logra cobra Afl. 15,7 miyon so extra. CAft ta recomenda pa intensiva e recuperacion di cobransa (“invorderingsactie”) riba e tereno di winstbelasting y grondbelasting den e di dos mita di aña.
E entradanan di impuesto indirecto pa cu e prome mita di aña 2018 ta yega na un suma total di Afl. 232,1 miyon. Por mira un adelanto di Afl. 10,6 miyon pa cu entradanan di importacion (“invoerrechten”) si compara esaki cu e entradanan di aña pasa. Mehoracion di “compliance” pa cu e tramitenan di Duana ta dunando su frutonan. E resultado di BBO durante e prome mita di aña ta yega na un suma di Afl. 55,0 miyon. CAft ta premira un aumento durante e di dos mita di aña mirando cu a ahusta e porcentahe di 1,5% pa 3% cu introduccion di e crisisheffing.
DIMP a cobra den e prome mita di aña Afl. 67,2 miyon na otro tipo di entradanan cu no ta impuesto. Esaki ta un adelanto substancial si compara cu aña pasa unda a cobra Afl. 14,3 miyon so durante e mesun temporada. E resto di entradanan cu no ta regarda impuesto ta entradanan di dividendo pa Gobierno.
CAft ta termina door di menciona cu mester sigui e desaroyonan di cerca pa evita cu den e di dos mita di aña e gastonan no subi mas hopi cu e entradanan.
cft_201800178_reactie_op_de_tweede_uitvoeringsrapportage_2018_aruba
