Diabierna atardi, den un ambiente masha placentero mes, a tuma luga na Consulado di Colombia aki na Aruba, un encuentro cu nos Consul, Dra. Francia Rodriguez Romero, huntu cu su ekipo campion, Sra Gisella Suarez y Sr. Fabian Soto, conhuntamente cu Director di Departamento di Cultura Aruba, Sr. Siegfried Dumfries y Jhon Freddy T. Montoya, na unda a tuma luga un bishita oficial pa anuncia e participacion di e grupo local “RCC Aruba” cu nan lo ta bay ta representado nos dushi Pais Aruba, como tambe Colombia, den e “17 China Internacional Circus Festival”.
RCC Aruba ta un grupo di acrobacia cu lo bay representa nos bandera na China e siman aki y Diego Jaramillo, director di e compañia a conta cu nan ta masha honra di a yega asina leu di por representa Aruba den e pais Asiatico aki.
Diaranson nan tabata tin un presentacion na Paseo Herencia, p’asina aki, Aruba henter por mira kico nan ta bay haci na China y awe diahuebs 17 di October nan lo ta na caminda pa inicia cu e reto grandi aki cu sigur nan lo sa di carga cu hopi responsabilidad y pasion.
E produccion Colombo-Arubano aki titula: TEETEEBOARD, tin como meta di mustra afo cu nos ta un pais multicultural y tambe refleha e manera cu nos como pais ta integra y mustra eyfo e potencial artistico cu ta reina den nos comunidad.
Nos di DCA ta desea e compañia completo aki di Ritmo Cubano y tur su integrantenan, hopi exito y bendicion durante di henter e actividad aki cu ta premira di ta uno hopi exitoso.
Masha danki di curason y bendicion na tur integrante: Oseas David Fernández, Diego Fernando Jaramillo, Yamila Hernández, Jhon Freddy Badillo, Jhon Garcia, Camilo Aguillon y Felipe Marin, pa nan energia, tempo y dedicacion brinda na e produccion aki cu dignamente nan lo representa nos den exterior.
