Cu e inauguracion di Hyatt Place Aruba Airport, Pelca Development Company, compania desaroyado di e proyecto di Aruba Airport & Business Center, ta introduci e centro di negoshi di mas nobo na Aruba.
Un proyecto cu a inicia den su fase di planificacion na 2016 a yega na un punto importante, cu ta e inauguracion di e wing di Hyatt Place. E siguiente fase di e proyecto lo ta e inauguracion di Caribbean Mercantile Bank, e foodcourt, e shopping mall y e concepto di Open Office Spaces.
E proyecto
E edificio ta consisti di 30.000m2 distribui den 7 piso, construi riba un tereno di aproximadamente 8.000m2. E prome 3 pisonan ta areanan publico y e 4 pisonan mas ariba lo ta cambernan di Hyatt na e wing banda noord y na e banda zuid lo ubica diferente oficina. Hyatt Place Aruba Airport ta un hotel cu ta consisti di 116 camber cu lo ofrece tur facilidad na su huesped. E hotel tin varios espacio pa reunion, training y workshops y un ballroom cu capacidad pa mas o menos 100 persona, un gym, pool y varios lounge. Den e edificio tambe lo tin ubica un foodcourt cu varios restaurant, un area comercial cu diferente tienda, un banco comercial y sin lubida un area di parkeo grandi. Tur usuario di e edificio lo tin un bista panoramico di e aeropuerto y di e isla.
E ekipo
E ekipo di diseño di e edificio a consisti di arkitectonan di renombre internacional manera Juan José Rocha, kende a traha hopi di cerca cu e arkitecto di Hyatt Fabio Grego, pa a asina incorpora e standard di Hyatt International den e diseño. A conta tambe cu asistencia y cooperacion di e interior designer di Hyatt Place, Ronald Zurcher y Carolina Barzuna y e arkitectonan Maria Baccarani y Mireya Besson di Grupos Pellizzari.
E diseño
Den e diseño di e edificio a tene varios aspecto na cuenta, entre nan a percura pa un diseño moderno y vanguardista, uzando e material di mas moderno cu ta pas tambe den e area. Como fachada a uza un pantaya di aluminium cu banda di ta simbolisa e olanan di lama di Aruba, ta proteha e edificio contra e solo potente y ta yuda reduci e gastonan di consumo di coriente cu aproximadamente 30%.
Compromiso cu Aruba
Cu inauguracion di e prome fase di e proyecto Aruba Airport Hotel & Business Center, Grupo Pellizzari ta confirma un bes mas su compromiso cu Aruba, contribuyendo cu un proyecto grandi y cu un inversion di mas cu 50 miyon dollar. Den e proximo simannan lo continua cu e apertura di e diferente fasenan di Aruba Airport Hotel & Business Center. Grupo Pellizzari tin mas proyecto planea pa Aruba y lo ta presentando esakinan den un futuro cercano.
Hyatt Place Aruba Airport ta maneha pa e dama Arubiano Marta Raven, kende tin hopi experencia den e ramo aki.
