Cuerpo Policial a informa di e ultimo desaroyo awe marduga relaciona cu detencion di Ralph Maduro, locutor di Power FM. A encarcel’e henter marduga, pero como cu e victima a opta pa no entrega keho ni pa destruccion di su propiedadnan na su cas y tampoco pa violencia domestico, Polis no por a haci nada otro cu laga e sospechoso bay cas liber.
Diasabra marduga Polis di Noord a bay na e compleho di condominio, Palma Aruba, situa na Palm Beach, pa un caso di agresividad y destruccion combina cu menasa contra un dama. Ey e patruya a topa cu resto di un television flatscreen completamente gespat for di otro. Bisiñanan a conta cu tabatin gritamento y diripiente a mira un television bulanda for di piso ariba te na suela.
Di acuerdo cu informacion na e sitio di incidente, e mucha muhe a yega su apartamento y su guy Ralph Maduro tabatey ta ward’e. E no a aprecia cu e amante a yega na e apartamento den e orario ey. A causa basta destruccion na e auto y propiedad den e condominio.
Segun informe oficial di Polis, pa 3:25am a detene Ralph Maduro pa destruccion. Despues a transport’e pa Warda di Polis na Shaba unda a present’e dilanti Fiscal auxiliar bou sospecho di destruccion y agresividad.
Pa mas of menos 10:00am e amante envolvi den e caso a pone autoridad na altura cu e no ta entrega keho riba e susedido. E mesun tipo di situacion a sosode caba den pasado cu e mesun pareha aki, den cual a destrui propiedad di e mucha muhe. E tempo ey tambe Polis a bay na Palm Beach pero Maduro a bisa nan cu ta e mes a cumpra e auto pa e amiga, pues no a haci daño na cos di otro hende.
Vocero di Polis a informa un rato pasa cu, pa 12:45pm despues di 6 ora di interogacion, conforme nos codigo di procedimiento penal, a laga Ralph Maduro den libertad. Polis a laga sa mesora cu e investigacion y caso awor ta den man di Ministerio Publico.
