Djabièrnè 18 di yanüari alrededor di 20.40’or, Tim di Mantenshon di Òrdu Públiko a tene un kontrol dirigí riba arma i droga riba Schottegatweg-West na altura di algun toko den Marchena.
E kontrol aki tabata relashoná ku informashon ku polis tabata dispone di dje tokante benta di droga i poseshon di arma di kandela den e área en kestion.
Na e sitio, den serkania di un bankomátiko, a tuma nota di un hòmber ku na momentu ku el a nota presensia di polis, a kana bai den direkshon di un baki di shushi.
En bista ku e hòmber aki a aktua hopi sospechoso, a kontrol’é i despues a kontrolá tambe den e baki di shushi.
Den e baki aki, polis a bin haña un revòlver ku a keda konfiská.
Mesora e agentenan a detené e hòmber E.S.S., nase na Kòrsou di 52 aña di edat pa violashon di lei di arma di kandela.
A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.
