Comunidad a reacciona hopi solidario cu e situacion di German Garcia Vargas, un pashent cu cancer terminal y ta na su cas pero cu mester di yudansa pa bay Bogota Colombia caminda lo brind’e un tratamento pa purba dun’e un miho calidad di bida y drecha e situacion cu e ta aden na e momento aki.
Asociacion Amigos de Colombia ta organisa un recaudacion di fondo pa yega na e suma necesario pa por transporta German pa Bogota caminda dokternan lo ta sperando su persona pa por brind’e tratamento. Diasabra awo for di 8:00AM nan lo ta presente na Acropolis Plaza na Tanki Leendert acompaña pa diferente stacion di radio cu lo forma parti di e radiothon pa invita e comunidad pa brinda nan aporte y asina yuda German den e momento dificil aki. A prepara un sistema di Drive Thru pa e comunidad por pasa deposita nan aporte.
Su traslado lo tin cu tuma luga via air ambulance , mirando e situacion delicado cu e ta aden, e no por bay den avion regular. A purba via Consulado pa haya un vuelo humanitario y ta gradici tur e esfuerso maximo pa logra esaki, pero no tabata posibel pa motibo di su sitaucion fisico cu e ta encontra su mes. E no ta rekeri mashin pero no por sostene un vuelo sinta ni tampoco bay den rolstoel y ta pa e motibo aki ta necesario un vuelo cu air ambulance y asistencia di dokter y/ of paramediconan durante vuelo.
Garcia tin 35 aña na Aruba, pero su deseo ta pa bay Colombia. E situacion aki por pasa cu tur hende, aworaki tin un pandemia grandi. Ta un situacion cu no por bandona. E ta agradeci cu hende di Aruba, di a brind’e apoyo. E ta sinti su mes tristo cu su situacion, pasobra nan a bin Aruba pa traha y tur ta Latino.
Un suma $13.500 ta locual ta e meta pa e recaudacion di fondo aki. Ta haci un suplica na e comunidad en general y muy special na e comunidad latino pa asisti diasabra awo na e recaudacion di fondo aki pa asina yuda un persona cu ta carga un speransa hopi grandi pa su salud por mehora. Tambe ta disponibel un cuenta di banco di Asociacion Amigos de Colombia caminda por haci donacion: RBC Bank – 7700000044851062. Tambe por tuma contacto cu na 566-2960 of na 562-1133.
