Den fin di siman gremio comercial a manda un carta pa gobierno. Desde cu a funda Camara di Comercio nobenta aña pasa, nan tin comercio na pecho y nan ta representa tur comerciante. AHATA y ATIA a acerca Camara di Comercio, unda cu e organisacion ta mira na ki manera pa yuda nan.
Satish Daryanani, presidente di Camara di Comercio, a bisa cu Minister President a yama e tres organisacionnan cu a firma e carta y pidi pa sigui yud’e cu ideanan. Nan a mira e draaiboek caba, pero mester di hende cu tin e curashi pa ehecuta e riesgo di comercio. E enfoke di gobierno ta pa percura di tin e infrastructura pa garantisa esun cu ta den problema su recurso, no solamente placa pero energia, no bay perdi. Camara di Comercio a pidi pa tin un reunion cu Parlamento riba e topico aki mas pronto posibel.
Na e momentonan aki Aruba ta den e parti di survival mode pa loke ta bin for di gobierno, cu ta percura pa tin un suma. Camara di Comercio a ripara cu hopi proveedor local y comerciantenan cu ta provee servicio na gobierno, tin un tardansa mas di 90 dia pa cobra. Daryanani a expresa cu no tin un capital nacional di Aruba mes cu por inverti, diversifica of pa cambia idependencia di sector hotel. E sector aki ta uno hopi importante y lo bin bek, pero lo tuma tempo. Aworaki no ta mira e placa pa futuro pa inverti bek, y no tin suficiente pa cuida e lunanan cu ta bin. Presidente di Camara di Comercio no sa si pa september tin placa of no. P’e motibo ey a manda den e carta dos opcion pa gobierno.
Nan ta prefera di sa cu tin un stancamento y tum’e como un acuerdo cu Hulanda. P’esey ta laga minister president, esta gobierno, dicidi con ta tum’e, pero tambe riba e condicionnan con por hacie of no. Den e carta ta mustra cu AHATA, ATIA y Camara di Comercio ta 100% tras di e parti cu mester un firmamento of lo tin di bay un di e dos opcionnan cu solamente tin pa Aruba. E prome opcion ta yega na un miho acuerdo y acepta e condicionnan temporario pa tin un fundacion fuerte, di cual Hulanda lo tin bista riba dje y duna asistencia. E di dos opcion ta nenga e condicionnan y laga e economia sigui bay den problema, unda cu no por paga servicionan publico y funda otro programa manera cuido di salud. Esaki lo pone cu lo mester declara bancarota y laga Hulanda tuma over, unda cu no lo tin Gobierno di Aruba ni Parlamento. Na 2018 esaki a pasa cu St. Eustatius, unda Hulanda a kita completamente e poder di Gobierno y Parlamento.
Camara di Comercio ta pendiente kico lo pasa e siman aki, pasobra comercio no por warda hopi mas door di e incertidumbre cu tin pa luna di september. Comercio kier sa kico ta bay pasa cu loonsubsidie, FASE, si gobierno por of no sigui paga su debenan tanto local como afo, asina Omar Tromp, vice-presidente di Camara di Comercio, a bisa.
