Ya caba pa casi trinta aña e boluntarionan di Quota Club prome y durante tur e paradanan di Carnaval ta pasa bende earplugsnan n’e publico cant’i caminda.
E aña aki no ta un excepcion. Ivy Simon-Hernandez, Presidente di Quota Club a cuminsa na bisa cu pa Quota Club e tabata exitoso. Despues di casi 30 aña, porfin e mensahe pa cuida nos oido ta yegando na e comunidad. El a indica cu nan tambe ta gusta Carnaval, nan ta subi caminda. Ultimo temponan Quota Club ta dunando charla n’e scolnan, pasobra cu ta bon pa cuminsa e campaña di conscientisacion cerca e muchanan.
E por a ripara tambe cu e muchanan ta hopi atento ora cu ta duna charla y e splicacion tocante e importancia di cuida nos oido. Algo cu sigur ta yuda, ya cu aña pa aña por bisa cu e mensahenan ta yega, ora cu mira cu e muchanan ta cla para cu nan florin. Tambe den e ultimo paradanan, tabata e grandinan cu ta cla para cu nan florin cla pa cumpra nan earplug.
Un peticion cu Quota tabatin, ta cu dies aña pasa nan a entrega un mocion na Gobierno, pa yega un acuerdo cu e bandanan, pa ora cu subi caya, principalmente parada di mucha, pa controla e zonido. Den cierto bandanan, por hasta sinti cu e zonido duro ta te hasta duna hartklop.
E zonido ta demasiado duro, demasiado largo y demasiado cerca ta e tres factornan cu ta haci c’un persona por perde su oido.
Durante e paradanan di Carnaval di Mucha, e bandanan a coopera basta bon. A midie un poco, cu a yega 85, 90db y te hasta 110db, cu ta demasiado hopi.
Por ultimo Simon-Hernandez a bisa cu e ta spera cu na final di e temporada nan por reuni un rato cu Gobierno di Aruba, pero e no ta den nan man. Quota ta conscientisa, pero no ta nan so. E ta un esfuerso di tur e instancianan, manera Gezondheidsdienst y otro departamentonan tambe.
Por cuminsa pensa caba pa e Carnaval di otro aña, pa e bandanan tin un app, cu nan por controla e zonido cu tin riba caminda.
