Dialuna ta un dia importante pa doñonan di Kentucky Fried Chicken. Nan ta habri un establecimento nobo na e crusada di De La Sallestraat y Kamerling Onnestraat. Pa basta luna a trabounan tabata andando. Awor e dia importante a yega pa apertura.
Nan kier a habri basta siman caba, pero pa motibo di cierto obligacionnan cu no tabata den nan man, a pone cu a tarda un poco. Awor tur instancia a haci nan keuring y awor ta cla pa habri. Kentucky Fried Chicken na Playa den su edificio nobo lo ta mas grandi cu esun den Hendrikstraat. Tin un parkinglot grandi pa clientenan.
A mira un area pa muchanan tambe hunga ora cu nan bin cu nan mayornan. Ademas e sala pa come ta mucho mas grandi cu mas mesa y mas stoel pa clientenan.
Un pabien na e doñonan cu a haci un inversion hopi grandi. Hunto cu e inversion ta duna tambe trabou na mas tata di famia. Dialuna awo e apertura oficial lo ta pa 7:00pm. Lo tin tambe apertura di nan “Drive Thru”. Esaki ta existi na tur otro sucursal di Kentucky Fried Chicken na Aruba, tanto na Palm Beach, Santa Cruz y na San Nicolas. Na Playa e no a existi nunca pero a inclui esaki den e proyecto pa e Kentucky Fried Chicken nobo.
Tocante Kentucky Fried Chicken
Kentucky Fried Chicken, conoci tambe como KFC, ta un restaurant Mericano di cuminda rapido specialisa den galiña hasa. Su oficina principal ta situa na Louisville, na Kentucky. E ta e di dos cadena di restaurant mas grandi na mundo, despues di McDonald’s. Tres aña pasa nan tabatin mas o menos 20 mil restaurant rond mundo, den 123 pais. E cadena ta pertenece na Yum! Brands, cu ta doño tambe di Pizza Hut, Taco Bell y Wingstreet.
Colonel Harland Sanders a funda Kentucky Fried Chicken na aña 1930 na Kentucky. Su prome “franchise” a habri na aña 1952 na Salt Lake City, Utah. E ta un di e prome restaurantnan di cuminda rapido Mericano cu a habri sucursalnan internacional, penetrando den e mercado di Canada, Inglatera, Mexico y Jamaica na aña 1960 caba. Na aña 1987 el a bira e prome restaurant Mericano pa habri na China, cu awor a bira e mercado mas grandi pa e compania completo!
Kentucky Fried Chicken ta conoci mundialmente pa su slogannan “It’s Finger Lickin’ Good!”, “Nobody does chicken like KFC” of “So good”.
