Un gran parti di e personanan cu a participa den un encuesta di caya di 24ora.com ta di opinion cu salario minimo na Aruba mester subi. Segun nan, e gastonan diario ta sigui aumenta, mientras cu e entrada di hopi trahado no ta alcanza pa cubri tur necesidad. Sinembargo, tin ciudadano cu ta considera importante pa evalua e aumento cu cuidou y tene cuenta tambe cu e posicion di sector comercial.
Den un encuesta di caya, reportero Edward del Orbe a sali pa scucha directamente di pueblo kico nan ta pensa tocante un posibel aumento di salario minimo. Despues di a scucha opinion di diferente gremio, sindicato y comerciante, e biaha aki e atencion tabata riba e consumidor y e trahado.
Un gran parti di e personanan entrevista a expresa cu un aumento di salario minimo ta necesario, pasobra casi tur cos a bira mas caro. Entre otro, nan a menciona gasolin, huur di cas, cuminda y diferente producto di consumo diario.
Un ciudadano a comenta cu e aumento den costo di bida no ta den proporcion cu e aumento chikito di salario. Otro a indica cu un persona mester por disfruta di bida sin tin preocupacion constante pa logra cubri su gastonan.
Tambe a sali na cla e situacion di personanan cu ta traha pa sostene nan famia. Un ciudadano a cuestiona si realmente un persona por biba na Aruba cu solamente un salario minimo, mientras cu otro a comenta cu hopi trahado mester busca un segundo trabao pa logra haya un tiki mas entrada.
Un participante a señala cu un cas normal cu dos camber y un baño por costa entre 1.600 y 2.000 florin pa luna. E suma aki ta representa casi henter un salario minimo, cu actualmente e participante a calcula rond di 2.000 florin.
Algun ciudadano a considera cu e salario minimo mester yega te na 2.900 of 3.000 florin, mientras cu otro a indica cu e aumento mester tuma luga den fase y basa riba calculacionnan rasonabel.
Pa mas lesa TREMPAN.COM.
