Durante un reunion di su partijraad dialuna anochi, AVP a encarga Prome Minister Mike Eman pa sigui cu e deliberacionnan cu gremionan y sector comercial tocante aumento di salario minimo na Aruba. Lider di partido, Wendrick Cicilia, a anuncia esaki y a indica cu e partido ta considera e tema como un paso importante pa mehora poder di compra di e sector mas humilde di comunidad.
Cicilia a señala cu salario minimo actualmente ta rond di 2.000 pa 2.100 florin, mientras cu e bestaansminimum ta entre 2.600 y 2.700 florin. Segun Minister Cicilia, e diferencia ta pone presion financiero riba famianan y ta haci necesario un intervencion.
Eman a splica cu e propuesta ta contempla un aumento gradual di salario minimo den un periodo di tres aña, acompaña pa un pakete di compensacion pa yuda especialmente negoshinan chikito y mediano. Sinembargo, e dialogo cu sector comercial ainda no a produci e resultado desea, pasobra, segun Eman, e gremionan comercial no a participa den e reunionnan anterior.
E Prome Minister a haci un yamada na e sector pa bin bek na mesa y presenta nan propuesta tocante e tipo di compensacion cu nan mester. El a indica cu gobierno ta dispuesto pa evalua diferente posibilidad, pero cu e proceso di aumento di salario minimo no por keda para.
Tocante e preocupacion cu un aumento salarial por haci Aruba mas caro, Eman a considera e argumento incorecto. Segun su splicacion, e componente di salario ta representa solamente un parti chikito di e costo total di mayoria producto y servicio, y p’esey un aumento di 200 florin no mester tin un impacto significativo riba prijs.
Facebook live link:
Eman no a duna un fecha pa e decision final, indicando cu ainda tin cu logra acuerdo cu tur e partinan envolvi.
