Hulanda ya a cuminsa brinda sosten tecnico na Aruba den e proceso di investigacion tocante e futuro di e tereno di refineria. Minister di Asuntonan Economico di Hulanda, Heleen Herbert, a confirma cu diferente experto di hafnan di Rotterdam y Amsterdam ta contribui na e trabao, mientras cu instituto Hulandes TNO ta brinda su experticio.
Herbert a splica cu e experto di e hafnan ta bin Aruba pa yuda cu e investigacionnan cu mester forma e base pa e siguiente decisionnan den e proceso. Ademas, TNO ta aporta conocemento tecnico durante e fase di investigacion.
E minister a duna e informacion aki ora un periodista a puntr’e si ya tabatin combersacion of acuerdo concreto cu Hulanda pa brinda sosten na Aruba en relacion cu e refineria.
Segun Herbert, tin accionnan cu ya a cuminsa, incluyendo e colaboracion cu experto y institucionnan Hulandes. E sosten aki ta enfoca riba e fase di investigacion, cu mester duna un base solido pa determina e siguiente pasonan.
Sinembargo, Herbert no a duna detaye di ningun acuerdo financiero ni di un decision final tocante e futuro di e refineria.
