Despues di 10 aña di preparacion y trabao, Cas di Cultura ta prepara pa un paso importante den e renobacion di su edificio. Dia 14 di november, e institucion cultural lo organisa “E Brasa Mediathon 2026”, un evento di 12 ora cu tin como meta recauda e ultimo 35% di e fondo necesario pa completa e renobacion y transforma Cas di Cultura den un espacio moderno, adapta pa e necesidadnan cultural y artistico di Aruba.
Directora di Cas di Cultura, Vicky Arens, a splica cu te awor e proyecto a logra sigura 65% di e suma necesario. E fondo recauda te awor a cubri trabounan di construccion, incluyendo cement, beton y tegel. E 35% cu falta lo cubri instalacionnan esencial, manera electricidad, plumbing, accesibilidad mediante lift, ekipo tecnico pa teatro, airco y panelnan solar.
Segun Arens, e proceso aki ta carga tras di dje 10 aña di preparacion, cu diferente desafio, incluyendo pandemia, cambio den detaye y cambio di team. Awor, Cas di Cultura ta haci un yamada na comunidad pa contribui y yuda completa e proyecto.
Un dia completo di actividad y entretenimento
Rochelle Richardson di Cas di Cultura a anuncia cu e mediathon lo tuma luga diasabra 14 di november, for di 9:00 di mainta te 9:00 di anochi. E actividadnan lo tuma luga den foyer y expo zaal di Cas di Cultura, cu presentacionnan musical, baile, entrevista y participacion di diferente figura di cultura na Aruba.
Entre e artista y gruponan cu lo participa tin Edjean Semeleer, Red Rock, ganado di Battle of the Bands di e aña aki, The 1986, Alyshea y e grupo di baile Ecomotion, ganado di Gang di Arte. Tambe lo tin contribucion di diferente pilarnan cultural, incluyendo algun participacion pregraba.
Durante e evento lo tin un call center pa ricibi yamada y compromisonan di donacion. SETAR lo brinda sosten cu e liñanan telefonico y e comunicacion, mientras cu Telearuba lo transmiti e evento na Canal 13 for di 9:00 di mainta te 9:00 di anochi. 24ora y diferente emisora di radio tambe lo participa den e cobertura, entre nan Hot 103.5 FM, Mas FM, Power FM, Canal 90 y VIP Radio.
Pa contribui, publico por haci transferencia bancario, paga via Sentoo of Pay.aw, of pasa personalmente na Cas di Cultura pa haci donacion cu cash of tarheta. E number di cuenta y e informacion necesario pa contribui lo comparti durante e mediathon.
Diferente manera pa apoya Cas di Cultura
Ademas di donacion directo, Cas di Cultura lo ofrece e posibilidad pa bira un “Friend” di e institucion. E miembresia ta costa 7.50 florin pa luna of 90 florin pa aña. Miembronan lo haya acceso na newsletter, informacion anticipa tocante espectaculo, oportunidad pa cumpra ticket prome cu otro publico y participacion den diferente premio y giveaway durante aña.
Esnan cu registra como miembro durante e mediathon lo participa den un sorteo pa gana un weekend stay na un hotel, cu nomber lo anuncia e dia mes.
Click pa lesa mas: https://www.facebook.com/share/v/1C9xpAzf8u/
Otro opcion ta “Adopt a Chair”, un programa simbolico cu ta ofrece publico e oportunidad pa dedica un stoel na Cas di Cultura. Un stoel general tin un costo di 500 florin, mientras cu un stoel VIP, situa den balcon VIP, ta costa 1.500 florin. E persona cu adopta un stoel lo haya un placa conmemorativo cu su nomber of e nomber di un ser stima, cu lo keda instala tras di e stoel pa un periodo di 10 aña. E stoel no ta bira propiedad priva di e donante.
Pa mas lesa TREMPAN.COM.
