Minister di Salubridad, Asunto Social, Cuido di Adulto Mayor y Maneho di Adiccion, drs. Mervin Wyatt-Ras, hunto cu Minister President Mike Eman, a entrega awe na Parlamento di Aruba e proposicion di ley Landsverordening tegemoetkoming voor kinderen met intensieve zorgbehoefte. Cu esaki, un iniciativa cu ambos a presenta como parlamentario na aña 2021 a alcansa un paso importante den su trayecto legislativo.
E proposicion di ley ta contempla un contribucion mensual di Afl. 500 pa cada mucha bou di 18 aña cu necesidad intensivo di cuido. E sosten financiero ta destina pa yuda famianan cu ta enfrenta gastonan y responsabilidad adicional relaciona cu cuido di nan yiunan, incluyendo terapia, tratamento y material special.
Un iniciativa cu a cuminsa na 2021
Durante su periodo como parlamentario, Minister Wyatt-Ras a tene diferente reunion cu mayornan, scolnan y instancianan den diferente barionan rond di Aruba, pa haya sa mas tocante e necesidadnan y retonan cu e famianan aki ta enfrenta. E necesidadnan identifica durante e reunionnan aki a forma e base pa e iniciativa presenta na 2021.
Como Minister di Asunto Social, Wyatt-Ras a sigui traha pa avansa cu e iniciativa y e proceso pa converti esaki den un proposicion di ley. E iniciativa a wordo incorpora den e Landspakket.
Na december 2025, e concepto di ley tabata entrega na Directie Wetgeving en Juridische Zaken (DWJZ) pa su revision. Despues di esey, e concepto tabata presenta na Raad van Advies. E preguntanan ricibi tabata contesta y e recomendacionnan tabata trata prome cu entrega di e proposicion na Parlamento.
Fortalecemento di proteccion social
Minister Wyatt-Ras a destaca cu tras di e iniciativa aki tin e realidad di famianan cu diariamente ta dedica hopi tempo, atencion y esfuerso na cuido di nan yiunan, mientras cu nan ta enfrenta gastonan adicional relaciona cu e cuido aki.
E iniciativa ta cuadra cu e vision di Ministerio pa fortalece proteccion social y promove un sociedad mas inclusivo, brindando sosten adicional na famianan y contribuyendo na e bienestar y desaroyo di muchanan cu necesidad intensivo di cuido.
Siguiente paso den e proceso legislativo
Cu entrega di e proposicion na Parlamento, e siguiente paso ta su tratamento parlamentario. Parlamento lo studia y trata e proposicion di ley, prome cu tuma un decision tocante su aprobacion.
Dos sesion informativo pa comunidad
Pa brinda comunidad mas informacion tocante e proposicion di ley, Minister Wyatt-Ras y Minister President Mike Eman ta invita mayornan, famianan, maestronan y profesionalnan pa participa na dos sesion informativo.
Durante e sesionnan lo brinda mas informacion tocante e sosten financiero contempla y e siguiente pasonan den e proceso. Tambe lo tin oportunidad pa haci pregunta.
Diamars 3 di november 2026
YMCA San Nicolas | 7:00 PM – 9:00 PM
Diahuebs 5 di november 2026
MFA Paradera | 7:00 PM – 9:00 PM
Registracion di antemano ta necesario. Personanan interesa por manda un e-mail na [email protected], mencionando nan nomber, cantidad di persona y sesion di preferencia. Espacio ta limita.
