Minister di Asuntonan Economico di Hulanda, Heleen Herbert, a bishita Aruba pa dialoga cu diferente actor economico y explora oportunidad pa stimula crecemento economico den henter Reino Hulandes. Durante su bishita, e minister a reuni tambe cu gobierno di Aruba pa trata diferente tema di desaroyo, entre otro energia sostenibel, e futuro di e tereno di refineria y diversificacion economico.
Herbert a splica cu esaki ta su prome bishita na Aruba den su funcion como Minister di Asuntonan Economico. Segun e minister, un parti importante di su trabao ta identifica oportunidad pa haci e economia crece, no solamente na Hulanda, sino tambe den e islanan di Caribe cu ta forma parti di Reino Hulandes.
Durante su bishita na Impact Hub, e minister a expresa su satisfaccion cu e entusiasmo y iniciativa empresarial cu el a observa entre e hendenan cu ta desaroya nan propio proyectonan.
Herbert a destaca cu ta importante pa sostene e personanan cu tin bon ideanan y e curashi pa transforma nan ideanan den negoshi. Den e contexto aki, el a menciona e Plataforma di Crecemento Economico Caribense, un iniciativa cu tin como meta duna sosten na empresanan cu ta cuminsa cu ideanan innovativo den diferente parti di Reino Hulandes.
Refineria y diversificacion economico
Durante su combersacionnan cu Gobierno di Aruba, Herbert a trata diferente tema relaciona cu e desaroyo economico di e isla. Entre e temanan menciona tabata energia sostenibel, e desaroyo di e tereno di refineria y otro oportunidadnan pa amplia e base economico di Aruba.
E minister a subraya cu diversificacion economico ta importante pa evita dependencia excesivo riba turismo, aunke e sector aki naturalmente tin un papel sumamente importante den economia di Aruba.
Segun Herbert, pa logra mas stabilidad economico, Aruba mester sigui inverti den innovacion, iniciativa empresarial y desaroyo di oportunidadnan nobo. Durante su bishita, el a observa hopi iniciativa y persona cu ta pensa den posibilidad pa sigui desaroya e economia.
Impact Hub ta busca continuidad di sosten
Durante su bishita na Impact Hub, Herbert a papia tambe tocante e sosten financiero cu e centro a haya for di Hulanda Europeo. E minister a reconoce cu e subsidio aki a contribui na resultado positivo y cu e inversion a duna bon resultado.
Sinembargo, Impact Hub a expresa interes pa haya posibilidad pa continua cu e sosten financiero. Herbert a indica cu ainda no tin un solucion concreto pa garantisa continuidad di e subsidio, pero el a señala cu e ampliacion di e iniciativa pa e otro islanan di Caribe ta representa un paso importante.
Manera parti di e ampliacion aki, Herbert a anuncia cu e siguiente dia e lo bishita Corsou, caminda lo firma un Memorandum of Understanding na Innovation Quarter. E acuerdo tin como meta uni e esfuersonan y fortifica e cooperacion entre e diferente islanan.
Herbert ta spera cu e colaboracion mas amplio aki lo haci e iniciativa mas atractivo pa financiadonan y habri porta pa mas sosten financiero.
E minister a expresa su interes pa contribui na e desaroyo di e plataforma y busca manera pa brinda sosten na Impact Hub den su siguiente fase.
