Ya pa algun dia caba tin diferente negociacion andando. Esey tin di haber cu cobramento di sushi cu lo bay drenta na vigor.
Hubert Dirksz, presidente di FTA ta splica cu nan a sinta na mesa pa basta dia. Durante gobierno anterior, a resisti e introduccion di pago di 27.50 pa luna pa cas, a bisa cu mester bin cu un tarifa social. Lamentablemente gobierno anterior, a bay di acuerdo pa bin cu un tarifa social, pero esaki no a wordo concretisa.
Manera cu e gobierno aki a sinta, a continua cu e combersacionnan y por fin a yega na un acuerdo, caminda cu e tarifa social ta wordo implementa entrante di 1 di Juli. E pago lo bay ta via belasting dienst, y via un sistema di belasting, cu ta wordo paga pa aña. Enbes di 27.50 pa luna, a acorda na un bracket di 0 te cu 90 florin pa luna, depende bo entrada. Por bisa cu mita di e comunidad ta bay paga un suma menos of igual cu 27.50.
E ta cuminsa na 0, bay 5, bay 15, 20, 30. E otro parti di comunidad cu tin un entrada mas halto, ta bay paga 45 bay ariba y asina yega te cu 90 florin pa luna. Esaki ta wordo cobra door di belasting.
Dicon e cambio
FTA a para ariba cu e tarifa mester ta social cu e grupo di menos entrada, no por carga e peso akinan. E pensionadonan, e hendenan cu tin salario minimo, e hendenan cu tin onderstand. Pesey, e grupo te cu 24mil florin di entrada pa aña, no ta bay paga. Nan tin 0 tarifa. Esey ta duna un espacio hopi grandi na un cantidad basta grandi di cas na Aruba y famianan cu no lo paga. Logicamente e grupo di mas grandi di un entrada hopi mas halto, ta bay paga un suma te cu 90 florin. Esnan cu ta paga 90 florin pa luna, ta riba 240 mil florin di entrada pa aña.
E pago
E tarifa ta wordo cobra, mescos cu ta cobra grondbelasting. Via Departamento di Impuesto e ta wordo regla. No mester paga na Serlimar. Ta haya e cobransa, por page pa luna, pero bo por page pa aña tambe.
Obligacion
Dirksz a splica cu door cu ta un belasting tin un obligacion pa pag’e. Tin algun punto cu mester wak con esey ta bay. E periodo con e ta sigui, manera esey, cu si bo tin un otro servicio manera di Ecotech, e ora eynan, door cu esaki ta belasting, si bo tin un entrada mas abao cu loke e servicio di Ecotech ta, e lo cumbinibo. Pero di un otro banda, e ora bo tin dos debe. Esey ta algo fastioso pa esnan cu tin entradanan halto y cu tin dos servicio cu nan tin cu paga pe. Pero door cu e ta belasting, esey ta wordo cobra como belasting. Bo no por negosh’e. Esey ta belastingdienst tin su forma con e ta bay regla esey. Tin otro problemanan cu por presenta, pero sigur pa loke ta para ariba, cu e pago aki no ta retroactivo.
Medida imponi
E ta un discusion cu a hiba hopi tempo cu gobierno anterior y e otro directiva di FTA, den e caso aki a hib’e. Dirksz a comenta di a para riba cu e mester ta social. Gobierno, segun ley ta responsabel via entrada cu e ta ricibi pa e limpiesa, pa mantene Aruba limpi. Pero na momento cu Serlimar a hay’e den un situacion dificil pa basta aña, a bin un ley cu bo tin cu paga. Y ta tempo di ex minister Booshi Wever, a bin cu esey y despues el a keda discuti y na final, gobierno anterior, a yega na un suma di 27.50. Pero awor aki ta sigui discuti. Door cu e ta un tarifa social, esnan cu mas entrada, ta carga pa esnan cu menos entrada.
Cos a cambia
E gobernacion nobo a bin cu e proposicion di bracket. Ta di supone cu belastingdienst, Serlimar y gobierno a presenta esaki.
Sindicatonan envolvi
E sindicatonan manera UEA y FTA a cuminsa cu otro den e discusion aki, mescos cu ALVAST. Tabata tin mas instancia envolvi, cual ta entre otro OPPA. A mantene e discusion y awor aki por fin a yega na un acuerdo.
E relacion cu FTA tin cu e otro sindicatonan, no ta manera antes. Esey no a wordo discuti cu nan. Diferente otro punto ta pendiente pa discuti, pero en todo caso e parti aki no a wordo discuti. Ta di spera cu di parti di comunidad por tin un aceptacion pa esaki. Si esey no ta e caso tin cu mira e desaroyonan.
Con ta draai’e bek
Door cu e ta un ley, mescos cu esun anterior, tabata ley, door di un resistencia hopi grandi di mayoria di comunidad, a haci cu e no por a wordo introduci, mientras cu tabata tin algun famia cu tabata paga na Serlimar, pero un gran parti a resisti, basa riba peticion di FTA mes pa no cumpli cu esaki, ya cu esnan di menos recurso, pa nan ta un peso grandi pa nan cartera.
