Pa duna un claridad riba e sentimento di e pueblo riba e situacion cu ta bibando den momento di crisis, a duna oportunidad na e comunidad, den forma di un “Poll” riba Facebook, pa den forma di un voto expresa nan pensamento riba informacion cu te na es momentonan aki nan ta ricibi for di Gobierno.
E pregunta riba su mes tabata simpel, si acaso ta e pueblo su derecho pa sa ken ta esnan infecta cu e virus y na cua bario nan ta biba y como contesta tabata tin dos opcion. Prome opcion: si, e pueblo tin derecho y como segundo opcion: no, e ta confidencial.
Un total di 4.5 mil persona a usa e Poll y a vota riba e topico aki y cu un porsentahe di 63% na fabor di haya mas informacion mientras 37% ta pensa cu e ta confidencial.
Un diferencia considerabel y cu ta duna un bista tambe di e preocupacion cu ta biba bou di e comunidad cu ta mira un nececidad pa duna por lo menos un indicacion na unda nan lo tin cu pone extra precaucion pa evita contagio di coronavirus. Mientrastanto 24ora.com lo sigui brinda mas informacion riba tur locual ta acontese rond di e crisis tumando luga riba nos isla.
